مظفرآباد(کشمیر ڈیجیٹل)آزاد جموں و کشمیر فوڈ اتھارٹی کی ٹیم نے کارروائی کرتے ہوئے غیر رجسٹرڈ اور لیبارٹری ٹیسٹنگ کے بغیر پانی تیار کرکے مارکیٹ میں فروخت کرنیوالے پلانٹ کو سیل کر دیا۔
کارروائی کے دوران انکشاف ہوا کہ مذکورہ پلانٹ میں پانی کی تیاری اور فروخت کے لیے فوڈ سیفٹی کے مقررہ قانونی تقاضے پورے نہیں کیے جا رہے تھے۔
مزید یہ بھی پڑھیں:مظفرآباد:غیررجسٹرڈ،غیرمعیاری پانی تیار و فروخت کرنیوالا پلانٹ سیل
فوڈ اتھارٹی حکام کے مطابق آزاد جموں و کشمیر فوڈ اتھارٹی ایکٹ 2017 اور آزاد کشمیر پیور فوڈ ریگولیشنز 2019 کے تحت پانی سمیت تمام غذائی مصنوعات کی تیاری اور فروخت کیلئے واضح ضابطہ کار اور معیاری طریقہ کار مقرر ہیں۔
ان تقاضوں کے مطابق کسی بھی برانڈ کی مارکیٹ میں فروخت سے قبل متعلقہ رجسٹریشن، مصنوعات کی لیبارٹری ٹیسٹنگ، معیار کی جانچ اور لیبلنگ کے قانونی تقاضوں کی تکمیل لازمی ہے۔
فوڈ اتھارٹی نے واضح کیا ہے کہ عوام کو محفوظ اور معیاری خوراک و پانی کی فراہمی پر کوئی سمجھوتہ نہیں کیا جائے گا اور قانونی تقاضوں کے برخلاف کاروبار کرنے والوں کے خلاف کارروائیاں جاری رہیں گی۔
مزید یہ بھی پڑھیں:راولاکوٹ میں امن کیلئے شرپسندوں کیخلاف سخت ایکشن لیا جائے، شہری
شہری غیر معیاری اور غیر رجسٹرڈ غذائی مصنوعات کی نشاندہی کے لیے فوڈ اتھارٹی کی ہیلپ لائن 1280 پر اطلاع دیں۔




