اسلام آباد:فیڈرل پبلک سروس کمیشن (ایف پی ایس سی) نے سی ایس ایس 2027 کے تحریری امتحان کے لیے درخواستیں طلب کر لی ہیں۔
آن لائن درخواستیں جمع کرانے کی آخری تاریخ 25 نومبر مقرر کی گئی ہے، جبکہ تحریری امتحان 27 جنوری 2027 سے ملک کے 19 شہروں میں شروع ہوگا۔
یہ بھی پڑھیں:سی ایس ایس تحریری امتحان کے نتائج جاری،حنیف ملک بیٹی بھی کامیاب
ایف پی ایس سی کے مطابق سی ایس ایس 2027 کے تحریری امتحان کے لیے صرف وہ امیدوار درخواست دے سکتے ہیں جنہوں نے ابتدائی اسکریننگ ٹیسٹ، یعنی ایم پی ٹی 2027، کامیابی سے پاس کیا ہو۔
اہل امیدوار مقررہ تاریخ تک ایف پی ایس سی کے آن لائن پورٹل کے ذریعے درخواست جمع کرا سکتے ہیں۔
کمیشن نے آن لائن درخواست کی دستخط شدہ ہارڈ کاپی اور مطلوبہ دستاویزات جمع کرانے کی آخری تاریخ 4 دسمبر مقرر کی ہے۔
امیدواروں کو ہدایت کی گئی ہے کہ آن لائن درخواست مکمل کرنے کے بعد اس کی دستخط شدہ کاپی اور تمام ضروری دستاویزات مقررہ وقت کے اندر کمیشن کو ارسال کریں۔
تحریری امتحان میں شرکت کے لیے کم از کم سیکنڈ ڈویژن بیچلر ڈگری ضروری ہے۔ امیدواروں کی عمر 21 سے 30 سال کے درمیان ہونی چاہیے اور عمر کا تعین 31 دسمبر 2026 کو کیا جائے گا۔
یہ بھی پڑھیں:سی ایس ایس امتحان میں کامیابی سمیٹنے والی آزادکشمیر کی 4 بیٹیاں، تعلق کہاں سے ہے؟
کمیشن کے قواعد کے تحت مخصوص اہل زمروں کے امیدواروں کو عمر کی بالائی حد میں دو سال کی رعایت بھی حاصل ہوگی۔
سی ایس ایس 2027 کا تحریری امتحان 27 جنوری 2027 سے ملک کے 19 شہروں میں منعقد ہوگا۔ امیدواروں کو درخواست، فیس، دستاویزات اور اہلیت سے متعلق تمام شرائط احتیاط سے مکمل کرنے اور تازہ معلومات کے لیے ایف پی ایس سی کی سرکاری ویب سائٹ باقاعدگی سے دیکھنے کی ہدایت کی گئی ہے۔
