مظفرآباد: حکومتِ آزاد کشمیر نے تعلیمی اداروں میں ڈیجیٹل گورننس کو فروغ دینے اور حاضری کا نظام جدید خطوط پر استوار کرنے کی جانب ایک اہم پیش رفت کی ہے۔ حکومت نے ہائر ایجوکیشن ڈیپارٹمنٹ کے زیرِ انتظام قائم جملہ سرکاری کالجز میں موبائل ایپ کے ذریعے بائیومیٹرک حاضری کے نظام کو نافذ کرنے کا فیصلہ کرتے ہوئے سات روز کے اندر تمام ملازمین کی رجسٹریشن مکمل کرنے کی سخت ہدایات جاری کر دی ہیں۔
نظامت تعلیم کالجز آزاد جموں و کشمیر سے جاری کردہ رسمی سرکلر کے مطابق ریاست کے تمام سرکاری کالجز کے سربراہان کو ہدایت کی گئی ہے کہ وہ موبائل ایپلیکیشن پر بائیومیٹرک رجسٹریشن کے حوالے سے فوری اور ضروری اقدامات اٹھائیں۔ سرکلر میں واضح طور پر بتایا گیا ہے کہ وزیر ہائر ایجوکیشن کی جانب سے جملہ سرکاری کالجز کے ملازمین کی حاضری کو مؤثر بنانے کے لیے جدید “ڈیوا ئس لیس بائیومیٹرک اٹینڈنس سسٹم” (Deviceless Biometric System) کا اجرا کر دیا گیا ہے۔
ڈیوائس لیس بائیومیٹرک سسٹم کا نفاذ اور تکنیکی خصوصیات:
سرکلر کی تفصیلات کے مطابق اس نئے نظام کے تحت پہلے سے موجود روایتی اور ثابت بائیومیٹرک مشینوں پر مبنی حاضری کے طریق کار کو اب موبائل ایپلیکیشن کے ذریعے جدید نظام پر منتقل کیا جا رہا ہے۔ اس تبدیلی کے بعد آزاد کشمیر کی “A&JK Biometric App” کے ذریعے روزانہ حاضری کا مکمل اور پورٹل ریکارڈ مرتب کیا جائے گا، جس سے تمام ملازمین کی حاضری کا ریکارڈ مرکزی ڈیٹا سینٹر کے ڈیش بورڈ پر براہِ راست مانیٹر کیا جا سکے گا۔
یہ بھی پڑھیں: ڈیجیٹل بینکنگ اور سائبر کرائمز: نہ پن کوڈ مانگا نہ کارڈ چھینا، پھر بھی بینک اکاؤنٹ خالی ہونے کا خدشہ
اس نفاذ کو ممکن بنانے اور انتظام سنبھالنے کے لیے تمام متعلقہ کالجز کے لیے ایک علیحدہ اور فعال پورٹل بھی تیار کر دیا گیا ہے۔ کالج فوکل پرسنز کو اس پورٹل کو فعال بنانے اور انتظامی امور سرانجام دینے کی ذمہ داری سونپ دی گئی ہے۔ نئے ضوابط کے تحت اب ہر ملازم اپنے ذاتی لاگ ان (Login) معلومات کا استعمال کرتے ہوئے موبائل فون پر حاضری لگانے کا پابند ہوگا، جس کی تصدیق اور ریکارڈ کالج کے پورٹل کے ساتھ ساتھ مرکزی ڈیش بورڈ پر بھی فوری دستیاب ہوگا۔
سات روز میں رجسٹریشن کا حکم اور مرکزی ڈیش بورڈ سے مانیٹرنگ:
نظامت تعلیم کالجز کی جانب سے کہا گیا ہے کہ اس نظام کو بلا تاخیر فعال بنانے کے لیے تمام ملازمین کی سات روز کے اندر اندر رجسٹریشن کرنے کا حکم صادر کیا گیا ہے تاکہ تمام عملے کی حاضری کو ہر صورت یقینی بنایا جا سکے۔ حکومت کے مطابق اس جدید اقدام کا مقصد تعلیمی اداروں میں ملازمین کی بروقت موجودگی کو یقینی بنانا، تعلیمی ماحول کو بہتر بنانا اور نظام کی شفافیت کو بڑھانا ہے۔
مزید پڑھیں: چھوٹے کاروبار کرنے والوں کے لیے اسٹیٹ بینک کا نیا ڈیجیٹل پلیٹ فارم متعارف
مرکزی ڈیش بورڈ سے تمام کالجز کے ملازمین کی روزانہ کی بنیاد پر حاضری مانیٹر کی جائے گی، جس کے باعث آزاد کشمیر کے سرکاری کالجز کا تعلیمی و انتظامی ڈھانچہ جدید تکنیکی سہولیات سے آراستہ ہو جائے گا۔ اس اقدام کو تعلیمی اداروں میں نظم و ضبط اور شفافیت کے قیام کی جانب ایک بڑا اور مثبت قدم قرار دیا جا رہا ہے۔
