سرد موسم میں گرم پانی سے غسل کرنا اکثر لوگوں کے لیے راحت اور سکون کا باعث بنتا ہے۔ ٹھنڈ سے بچنے اور جسمانی تھکاوٹ کم کرنےکیلئے لوگ دیر تک گرم پانی کے نیچے نہانا پسند کرتے ہیں، لیکن ماہرین کے مطابق ضرورت سے زیادہ گرم پانی کا مسلسل استعمال جلد کی قدرتی خوبصورتی اور صحت کو متاثر کر سکتا ہے۔
زیادہ گرم پانی جلد کے قدرتی تیل ختم کر سکتا ہے
جلد کی بیرونی تہہ جسم میں نمی برقرار رکھنے اور بیرونی اثرات سے حفاظت کرنے میں اہم کردار ادا کرتی ہے۔ اس تہہ کو صحتمند رکھنے کیلئے جلد میں موجود قدرتی چکنائی بھی ضروری ہوتی ہے۔ تاہم جب بہت زیادہ گرم پانی سے غسل کیا جاتا ہے تو یہ قدرتی تیل کم ہونے لگتے ہیں، جس کے نتیجے میں جلد اپنی نمی کھونے لگتی ہے اور خشک و بے رونق دکھائی دینے لگتی ہے۔
خشکی، خارش اور جلد پر سرخی کا خدشہ
طویل وقت تک گرم پانی سے نہانے کی عادت جلد میں کھنچاؤ، خارش اور پپڑی بننے جیسے مسائل پیدا کر سکتی ہے۔ بعض افراد کو جلد پر سرخی اور جلن کی شکایت بھی ہونے لگتی ہے۔ خاص طور پر حساس جلد رکھنے والے افراد اور ایکزیما کے مریضوں میں زیادہ گرم پانی سے غسل کرنے کے باعث علامات میں شدت آ سکتی ہے۔
نیم گرم پانی سے غسل کرنا بہتر انتخاب
سردیوں میں جلد کو محفوظ رکھنے کیلئے انتہائی گرم پانی کے بجائے ہلکا نیم گرم پانی استعمال کرنا زیادہ مناسب ہے۔ پانی کا درجہ حرارت ایسا ہونا چاہیے جس سے جسم کو آرام ملے اور جلد پر جلن یا سرخی محسوس نہ ہو۔ غسل کا دورانیہ بھی پانچ سے دس منٹ تک محدود رکھنا بہتر ہے تاکہ جلد کی قدرتی نمی زیادہ متاثر نہ ہو۔
غسل کے بعد موئسچرائزر لگانا نہ بھولیں
جلد کی حفاظت کیلئے نہاتے وقت تیز خوشبو اور سخت کیمیکلز والی مصنوعات سے گریز کریں اور نرم کلینزراستعمال کریں۔ جسم کو تولیے سے زور زور سے رگڑنے کے بجائے نرمی سے خشک کریں۔ غسل کے فوراً بعد موئسچرائزر لگانے سے جلد میں نمی برقراررکھنے میں مدد ملتی ہے۔
مزید یہ بھی پڑھیں:موسمِ سرما میں نزلہ، کھانسی اور خشک جلد ، گھریلو علاج سے آرام ممکن
سردیوں میں جلد کو صحت مند اور تروتازہ رکھنے کیلئے ضروری ہے کہ نہانے کے دوران پانی کا درجہ حرارت مناسب رکھا جائے، غسل کا وقت زیادہ نہ بڑھایا جائے اور جلد کی نمی برقرار رکھنے والی مصنوعات کا باقاعدگی سے استعمال کیا جائے۔ ان معمولی احتیاطی تدابیر سے سرد موسم میں بھی جلد کو خشکی اور جلن سے محفوظ رکھنے میں مدد مل سکتی ہے۔
