اسلام آباد(کشمیر ڈیجیٹل) نوری آڈیٹوریم میں پاکستان اٹامک انرجی کمیشن کی طرف سے سابق چیئرمین مرحوم انجینئر پرویز بٹ، NI، HI، SI کو خراجِ عقیدت پیش کرنے اور پاکستان کیلئے ان کی زندگی بھر کی خدمات کو خراجِ تحسین پیش کرنے کیلئے یادگاری ریفرنس منعقد کیا گیا۔
چیئرمین پاکستان اٹامک انرجی کمیشن ڈاکٹر راجہ علی رضا انور نے سابق چیئرمین کو بھرپور خراجِ عقیدت پیش کیا اور کمیشن اور ملک کے لیے ان کی گراں قدر خدمات کو اجاگر کیا۔
ڈاکٹر راجہ علی رضا انور نے کہا کہ مرحوم انجینئر پرویز بٹ ایک غیر معمولی ٹیکنالوجسٹ، انجینئر اور دور اندیش رہنما تھے۔ انہوں نے 2002 میں ڈائریکٹوریٹ آف سیفٹی قائم کرکے پاکستان اٹامک انرجی کمیشن میں جوہری ٹیکنالوجی کے محفوظ استعمال کیلئے ایک مضبوط حفاظتی نظام کی بنیاد رکھی۔
اسی وجہ سے انہیں جوہری تنصیبات میں محفوظ اور ذمہ دارانہ عملی نظام کے فروغ کے اہم علمبرداروں میں شمار کیا جا سکتا ہے۔ وہ معاملات کو سمجھنے، مؤثر انداز میں بات چیت کرنے اور اہم معاملات کو کامیابی سے طے کرنے کی غیر معمولی صلاحیت بھی رکھتے تھے۔
مزید یہ بھی پڑھیں:نیوکلیئر پاور پلانٹ چشمہ یونٹ-1 نے 427 روزہ مسلسل آپریشن کیساتھ پاکستان اٹامک انرجی کمیشن کا نیا ریکارڈ قائم کر دیا
ڈاکٹر راجہ علی رضا انور نے مزید کہا کہ انجینئر پرویز بٹ ایک ایسے شجرِ سایہ دار کی مانند تھے جن کی سرپرستی، بصیرت اور خدمات نے آنے والی نسلوں کیلئے بھی فائدہ مند اثرات چھوڑے۔
مرحوم ’’روڈ ٹو چاغی‘‘ کے ان خاموش ہیروز میں شامل تھے جن کی خدمات کو وہ شہرت نہیں مل سکی جس کے وہ مستحق تھے۔
چیئرمین پاکستان اٹامک انرجی کمیشن ڈاکٹر راجہ علی رضا انور نے تقریب سے خطاب کرتے ہوئے مزید کہا کہ انجینئر پرویز بٹ کی دور اندیشی کے ثمرات آج ان منصوبوں اور اداروں کی صورت میں ہمارے سامنے موجود ہیں جن کا انہوں نے تصور پیش کیا اور انہیں قائم کیا۔
ان میں پاکستان اٹامک انرجی کمیشن جنرل ہسپتال اور پاکستان اٹامک انرجی کمیشن فاؤنڈیشن شامل ہیں۔ اس کے علاوہ” ایس ای ایس ” اور دیگر انجینئرنگ اداروں کے قیام میں بھی ان کا اہم کردار تھا، جنہوں نے ملک کو اس کی حتمی کامیابی اور عظمت حاصل کرنے میں مدد دی۔
یادگاری ریفرنس میں کمیشن کے اراکین، سیکریٹری، سینئر افسران، انجینئر پرویز بٹ کے سابق ساتھی اور رفقاء، ان کے اہلِ خانہ اور دیگر معزز مہمانوں نے بھی شرکت کی۔
تقریب میں انجینئر پرویز بٹ کے سابق ساتھیوں اور سینئر افسران نے ان کے شاندار پیشہ ورانہ کیریئر اور قومی خدمات سے متعلق اپنی یادیں اور تاثرات بیان کیے۔
انہوں نے پاکستان کے جوہری پروگرام کے لیے انجینئر پرویز بٹ کی خدمات اور کردار کو یاد کرتے ہوئے خراج تحسین پیش کیا ۔
سابق جنرل منیجر، KCP-I، جناب نعمت علی جاوید، سائنسدان ایمیریٹس ڈاکٹر انعام الرحمٰن، سابق ممبر (ایڈمن اینڈ بی ایس)، ڈاکٹر کوثر عبداللہ ملک ، سابق ممبر انجینئرنگ، جناب اسلم عمر اور سابق ممبر (پاور) جناب ضیاء الحسن صدیقی نے انجینئر پرویز بٹ کے ساتھ اپنی وابستگی اور کام کے تجربات کے بارے میں گفتگو کی۔
انہوں نے انجینئر پرویز بٹ کی پیشہ ورانہ وابستگی، قیادت، قابلیت اور ملک کے لیے ان کی گراں قدر خدمات کو بھرپور خراجِ عقیدت پیش کیا
اس موقع پر پاکستان اٹامک انرجی کمیشن کے ممبر (سائنس)، ڈاکٹر شکیل عباس روفی نے ایک منظوم خراجِ عقیدت کے ذریعے مرحوم انجینئر پرویز بٹ کی خدمات، قومی کردار اور شاندار پیشہ ورانہ زندگی کو خراجِ تحسین پیش کیا۔
سابق چیئرمین پاکستان اٹامک انرجی کمیشن جناب محمد نعیم، پاکستان اٹامک انرجی کمیشن کی تاریخ کی ایک معروف شخصیت جناب سلطان بشیر الدین محمود اور مرحوم کے صاحبزادے میجر جنرل شہریار پرویز بٹ، ڈائریکٹر جنرل (PDS) ایس پی ڈی نے بھی اپنے خیالات کا اظہار کیا۔
انہوں نے سابق چیئرمین کی پیشہ ورانہ زندگی، قیادت اور پاکستان کی تزویراتی اور جوہری صلاحیتوں کے لیے ان کی دیرپا خدمات کے مختلف پہلوؤں کو یاد کیا۔
اس سے قبل ’’In the Loving Memory of a Man Who Lived for Pakistan‘‘ کے عنوان سے ایک دستاویزی فلم بھی دکھائی گئی جسے پاکستان اٹامک انرجی کمیشن کے پبلک ریلیشنز ڈائریکٹوریٹ نے تیار کیا تھا۔
دستاویزی فلم میں انجینئر پرویز بٹ کی زندگی اور پیشہ ورانہ سفر کو پیش کیا گیا۔ اس ڈاکومنٹری میں ان کی پیشہ ورانہ کامیابیوں، قوم کیلئے خدمات اور پاکستان سے ان کی گہری وابستگی اور لگن کو بھی بھرپور انداز میں اجاگر کیا گیا۔
مقررین نے انجینئر پرویز بٹ کو ایک مخلص، باصلاحیت اور کامیاب پیشہ ور کے طور پر یاد کیا، جنہوں نے اپنی مہارت، تجربے اور قائدانہ صلاحیتوں کو ملک کی خدمت کے لیے وقف کیے رکھا۔
مقررین نے پاکستان کے جوہری پروگرام کی ترقی اور اسے مضبوط بنانے میں انجینئر پرویز بٹ کے اہم کردار کو اجاگر کیا اور ملک کے لیے ان کی خدمات کے دیرپا اثرات کا اعتراف کیا۔
یادگاری ریفرنس نے ساتھیوں، دوستوں اور اہلِ خانہ کو انجینئر پرویز بٹ کو یاد کرنے اور ان کی زندگی، کامیابیوں اور پاکستان کے لیے ان کی دیرپا خدمات کو خراجِ تحسین پیش کرنے کا موقع فراہم کیا۔
