جاپان کے شہر نشین میں جاری ایشین گیمز 2026 کے کرکٹ ایونٹ کے پہلے سیمی فائنل میں پاکستان نے بنگلادیش کو شکست دے کر فائنل میں رسائی حاصل کرلی۔
میچ میں پاکستان کے کپتان صاحبزادہ فرحان نے ٹاس جیت کر پہلے بنگلادیش کو بیٹنگ کی دعوت دی۔ گیلی آؤٹ فیلڈ کے باعث اس اہم سیمی فائنل کے میچ کو فی اننگز 13 اوورز تک محدود کردیا گیا تھا۔
بنگلادیش کی ٹیم نے مقررہ 13 اوورز کے اختتام پر 7 وکٹوں کے نقصان پر مجموعی طور پر 111 رنز بنائے۔ توحید ہردوئی نے 42 رنز کی ذمہ دارانہ اننگز کھیل کر اپنی ٹیم کی طرف سے سب سے زیادہ رنز اسکور کیے۔
پاکستان کی طرف سے بولنگ کے شعبے میں سفیان مقیم نے انتہائی عمدہ کارکردگی کا مظاہرہ کرتے ہوئے حریف ٹیم کے 3 کھلاڑیوں کو پویلین کی راہ دکھائی، جبکہ عرافات منہاس نے بھی شاندار بولنگ کرتے ہوئے 2 وکٹیں حاصل کیں۔
یہ بھی پڑھیں: ایشین گیمز والی بال: بھارت کو شکست، پاکستان کی سیمی فائنل میں رسائی
قومی ٹیم کو فتح حاصل کرنے کے لیے 112 رنز کا ہدف ملا، جو پاکستان نے مقررہ ہدف کے تعاقب میں 12ویں اوور میں صرف 4 وکٹوں کے نقصان پر باآسانی حاصل کرلیا۔
پاکستان کی بیٹنگ لائن میں عبدالصمد نے میدان میں اتر کر انتہائی جارحانہ انداز اپنایا اور صرف 15 گیندوں پر 30 رنز کی شاندار اور ناقابلِ شکست اننگز کھیل کر ٹیم کی جیت میں اہم کردار ادا کیا۔ حسن نواز نے 22 گیندوں کا سامنا کرتے ہوئے 27 رنز بنائے، جبکہ اوپنر صائم ایوب نے 12 گیندوں پر 21 قیمتی رنز اسکور کیے۔
یوں قومی کھلاڑیوں کی بہترین کارکردگی کی بدولت پاکستان نے بنگلادیش کو شکست دے کر ایشین گیمز 2026 کے کرکٹ ایونٹ کے فائنل میں اپنی پکی جگہ بنا لی۔
Pakistan’s playing XI for the #AsianGames semi-final 🆚 Bangladesh 🏏🇵🇰
#PAKvBAN | #BackTheBoysInGreen https://t.co/zmQNQkOwCh
— Pakistan Cricket (@TheRealPCB) October 1, 2026
