واٹس ایپ نے اپنے صارفین کو آن لائن فراڈ اور دھوکہ دہی سے محفوظ رکھنے کے لیے ایک نیا اے آئی فیچر متعارف کرانے کی تیاری مکمل کر لی ہے۔ یہ نیا اے آئی سسٹم ممکنہ اسکام اور مشتبہ گفتگو کی نشاندہی میں اہم کردار ادا کرے گا۔
رپورٹ کے مطابق اے آئی پر مبنی اسکام ڈیٹیکشن فیچر آن ڈیوائس مصنوعی ذہانت استعمال کرے گا۔ اس جدید ٹیکنالوجی کے ذریعے مشتبہ گفتگو کے انداز اور استعمال شدہ زبان کا تفصیلی جائزہ لے کر ممکنہ فراڈ کا درست اندازہ لگایا جائے گا۔
آن ڈیوائس پروسیسنگ اور غیر محفوظ نمبروں کی نگرانی:
اس نئے نظام کی سب سے اہم بات یہ ہے کہ اس کا اے آئی ماڈل صارف کے اسمارٹ فون پر ہی براہ راست کام کرے گا۔ اس کا مطلب یہ ہے کہ کسی بھی تجزیے کے لیے پیغامات کو کسی مرکزی سرور پر بھیجنے کی بالکل ضرورت نہیں ہوگی۔
یہ بھی پڑھیں: واٹس ایپ اپ ڈیٹ!اب اسٹیٹس اپ لوڈ کرنے کے بعد کیپشن تبدیل ہو سکتا ہے
رپورٹ میں مزید بتایا گیا ہے کہ یہ نیا فیچر خاص طور پر ان افراد کی چیٹس کا جائزہ لے گا جن کے فون نمبرز صارف کی کانٹیکٹ لسٹ میں محفوظ نہیں ہوں گے۔ مشین لرننگ ماڈل گفتگو کے انداز اور زبان کو جانچ کر یہ پتہ لگائے گا کہ آیا چیٹ میں فراڈ کے ممکنہ اشارے موجود ہیں یا نہیں۔
وارننگ الرٹ اور صارفین کے اختیارات:
اگر یہ سسٹم کسی گفتگو کو ممکنہ اسکام قرار دیتا ہے تو صارف کو واٹس ایپ پر ایک وارننگ نوٹیفکیشن دکھایا جائے گا۔ یہ وارننگ الرٹ صرف متعلقہ صارف کو نظر آئے گا اور پیغام بھیجنے والے دوسرے شخص کو اس کا بالکل علم نہیں ہو سکے گا۔
مشتبہ چیٹ کی وارننگ سامنے آنے پر صارف کے پاس مختلف اختیارات موجود ہوں گے۔ وہ متعلقہ شخص کو بلاک یا رپورٹ کر سکے گا، گفتگو جاری رکھ سکے گا یا پھر اس چیٹ کو قابل اعتماد قرار دے سکے گا۔ اگر صارف کسی چیٹ کو ٹرسٹڈ قرار دیتا ہے تو واٹس ایپ اس گفتگو کے لیے اسکام کی وارننگز دکھانا بند کر دے گا۔
پرائیویسی کا تحفظ اور فیچر کا بنیادی مقصد:
میٹا کے مطابق اے آئی پر مبنی اس نئے نظام کے باوجود صارفین کی پرائیویسی کسی صورت متاثر نہیں ہوگی۔ کمپنی کا کہنا ہے کہ مشین لرننگ ماڈل براہ راست صارف کے آلے پر کام کرتا ہے، اس لیے واٹس ایپ پیغامات تک کمپنی کو خود بھی رسائی حاصل نہیں ہوگی۔
اس نئے فیچر کا بنیادی مقصد صارفین کو ایسے فراڈ سے بروقت خبردار کرنا ہے جن میں نامعلوم افراد مشتبہ پیغامات، لنکس یا گفتگو کے ذریعے انہیں نقصان پہنچانے کی کوشش کرتے ہیں۔
