برگن اسٹاک: سوئٹزرلینڈ میں جاری امریکا اور ایران کے مابین تاریخی امن مذاکرات کے موقع پر ایک انتہائی اہم سفارتی ملاقات میں وزیرِ اعظم میاں محمد شہباز شریف سے امریکی نائب صدر جے ڈی وینس نے باقاعدہ ملاقات کی ہے۔
ذرائع کے مطابق، وزیرِ اعظم شہباز شریف اور فیلڈ مارشل عاصم منیر اس وقت امریکا ایران مذاکرات میں بطور ثالث شرکت کے لیے سوئٹزرلینڈ میں موجود ہیں، جہاں برگن اسٹاک کے مقام پر ان کی ملاقات امریکی نائب صدر جے ڈی وینس سے ہوئی ہے، جسے عالمی امن کی کوششوں میں ایک بڑی پیش رفت قرار دیا جا رہا ہے۔
یہ بھی پڑھیں:ایران امریکامذاکرات، وزیراعظم، فیلڈ مارشل بطور ثالث سوئٹرز لینڈ پہنچ گئے، ایئر پورٹ پر شاندار استقبال
امریکی وفد کی تفصیلات اور اہم ملاقاتیں:
اس انتہائی اہم سفارتی بیٹھک میں امریکی نائب صدر جے ڈی وینس کے ہمراہ ان کے اعلیٰ سطحی وفد میں جیرڈ کشنر اور اسٹیو وٹکوف بھی موجود تھے، جنہوں نے وزیرِ اعظم پاکستان سے ملاقات کی اور خطے میں پائیدار امن کے قیام سمیت دیگر تیکنیکی امور پر تبادلہ خیال کیا۔
وزیراعظم شہباز شریف کی ایرانی وفد سے آئندہ ملاقات:
ذرائع کا بتانا ہے کہ امریکی وفد سے اس اہم اور کامیاب ملاقات کے بعد اب وزیرِ اعظم شہباز شریف جلد ہی ایرانی وفد سے بھی ملاقات کریں گے۔ اس آنے والی بیٹھک میں ایرانی وفد کی سربراہی باقر قالیباف کریں گے، جبکہ ان کے ساتھ ایرانی وزیرِ خارجہ عباس عراقچی اور دیگر اعلیٰ حکام بھی میز پر موجود ہوں گے تاکہ مذاکرات کے اگلے دور کو حتمی شکل دی جا سکے۔
