پاکستان میڈیکل اینڈ ڈینٹل کونسل (پی ایم اینڈ ڈی سی) نے ایم بی بی ایس اور بی ڈی ایس پروگراموں میں داخلوں کے لیے میڈیکل اینڈ ڈینٹل کالجز ایڈمیشن ٹیسٹ (MDCAT) 2026 کا باقاعدہ شیڈول جاری کر دیا ہے۔ کونسل کی جانب سے جاری کردہ پبلک نوٹس کے مطابق، ملک بھر میں داخلوں کا یہ اہم ترین ٹیسٹ رواں سال 16 اگست کو منعقد کیا جائے گا۔
میڈیکل کے شعبے میں کیریئر بنانے کے خواہشمند ہزاروں امیدواروں کے لیے یہ ٹیسٹ اتوار 16 اگست 2026 کو صبح 10 بجے بیک وقت ملک بھر میں شروع ہو گا۔ پی ایم اینڈ ڈی سی نے تمام صوبوں اور خطوں کے لیے متعلقہ جامعات کو ٹیسٹ کے پرامن اور شفاف انعقاد کی ذمہ داریاں بھی تفویض کر دی ہیں تاکہ طلبہ کو کسی قسم کی پریشانی کا سامنا نہ کرنا پڑے۔
صوبائی سطح پر ٹیسٹ کے انعقاد کی ذمہ داریاں:
کونسل کے جاری کردہ پبلک نوٹس کے مطابق، پنجاب بھر میں ایم ڈی کیٹ کے انعقاد کی ذمہ داری یونیورسٹی آف ہیلتھ سائنسز لاہور (UHS) کو سونپی گئی ہے۔ اسی طرح صوبہ سندھ میں سکھر آئی بی اے یونیورسٹی، خیبر پختونخوا میں خیبر میڈیکل یونیورسٹی پشاور (KMU)، اور بلوچستان میں بولان یونیورسٹی آف میڈیکل اینڈ ہیلتھ سائنسز کوئٹہ (BUMHS) ٹیسٹ کا انعقاد کریں گی، جبکہ وفاقی دارالحکومت اسلام آباد، آزاد جموں و کشمیر، گلگت بلتستان اور سعودی عرب کے شہر ریاض کے امیدواروں کے لیے ٹیسٹ لینے کی ذمہ داری شہید ذوالفقار علی بھٹو میڈیکل یونیورسٹی اسلام آباد (SZABMU) کے پاس ہوگی۔
یہ بھی پڑھیں: اگلے 24 گھنٹے اہم: این ڈی ایم اے کاملک کے بیشتر حصوں میں شدید بارشوں کا الرٹ جاری
آن لائن رجسٹریشن کا طریقہ کار اور اہم تاریخیں:
ایم ڈی کیٹ 2026 کے لیے امیدواروں کی آن لائن رجسٹریشن کا عمل کل یعنی 22 جون 2026 سے باقاعدہ طور پر شروع ہو جائے گا۔ پی ایم اینڈ ڈی سی کے مطابق، معمول کی فیس کے ساتھ آن لائن رجسٹریشن کرانے کی آخری تاریخ 8 جولائی 2026 مقرر کی گئی ہے، تاہم جو امیدوار کسی وجہ سے مقررہ وقت پر فارم جمع نہیں کرا سکیں گے، وہ تاخیر سے رجسٹریشن (لیٹ فیس کے ساتھ) 13 جولائی 2026 تک اپنی درخواستیں جمع کرانے کے اہل ہوں گے۔
ملکی اور بین الاقوامی سینٹرز کے لیے فیس کا ڈھانچہ:
پاکستان میڈیکل اینڈ ڈینٹل کونسل نے پاکستان کے اندر قائم تمام ٹیسٹ سینٹرز کے لیے معمول کی رجسٹریشن فیس 9 ہزار روپے مقرر کی ہے، جبکہ مقررہ تاریخ کے بعد لیٹ رجسٹریشن فیس 13 ہزار روپے وصول کی جائے گی۔ دوسری جانب، سعودی عرب (ریاض) میں قائم بین الاقوامی ٹیسٹ سینٹر کے امیدواروں کے لیے رجسٹریشن فیس 45 ہزار روپے اور لیٹ رجسٹریشن فیس 55 ہزار روپے مقرر کی گئی ہے، اور کونسل نے واضح کیا ہے کہ تمام جمع شدہ فیسیں ناقابل واپسی اور ناقابل منتقلی ہوں گی۔
مزید پڑھیں: سرکاری ملازمین کے لیے پیٹرول اور گاڑیوں کی سہولت بحال، جمعہ کی چھٹی ختم
امیدواروں کے لیے کونسل کی اہم ہدایات:
پی ایم اینڈ ڈی سی کی جانب سے تمام امیدواروں کو سختی سے ہدایت کی گئی ہے کہ وہ کسی بھی قسم کی زحمت سے بچنے کے لیے مقررہ مدت کے اندر ہی اپنی آن لائن رجسٹریشن کا عمل لازمی مکمل کریں۔ اس کے ساتھ ہی کونسل نے طلبہ کو مشورہ دیا ہے کہ وہ اپنے اپنے خطے کی متعلقہ نامزد یونیورسٹیوں کی آفیشل ویب سائٹس کا مسلسل دورہ کرتے رہیں تاکہ داخلہ ٹیسٹ کے نصاب، رول نمبر سلپ اور دیگر ضروری معلومات سے بروقت باخبر رہ سکیں۔
