پنجاب میں جدید اور ماحول دوست ٹرانسپورٹ کے فروغ کے لیے ایک اہم پیش رفت سامنے آئی ہے، جہاں سرکاری ملازمین کے لیے آسان اقساط پر ای بائیک حاصل کرنے کا طریقہ واضح کر دیا گیا ہے۔
وزیراعلیٰ پنجاب مریم نواز کی زیر صدارت ہونے والے ایک اہم اجلاس میں سرکاری ملازمین کے لیے خصوصی ای بائیک اسکیم کی منظوری دے دی گئی ہے۔ اس منصوبے کے تحت سرکاری ملازمین کو آسان اقساط پر الیکٹرک بائیکس فراہم کی جائیں گی تاکہ ان کے روزمرہ سفر کو آسان اور کم خرچ بنایا جا سکے۔
اجلاس کے دوران صوبے کے مختلف اضلاع میں الیکٹرک بسوں کی فراہمی پر بھی غور کیا گیا۔ پہلے مرحلے میں اٹک، بھکر، حافظ آباد، خانیوال، لیہ اور شیخوپورہ سمیت 10 اضلاع میں نئی الیکٹرک بسیں چلائی جائیں گی۔ بریفنگ میں بتایا گیا کہ اس ماہ 100 الیکٹرک بسیں پنجاب پہنچ جائیں گی، جبکہ جون تک ان کی تعداد بڑھ کر 714 ہو جائے گی۔
یہ بھی پڑھیں: وزیراعلیٰ مریم نواز کا سرکاری ملازمین کیلئے بائیک پراجیکٹ شروع کرنے کا فیصلہ
وزیراعلیٰ نے ہدایت کی کہ تحصیل سطح تک ٹرانسپورٹ نظام کو بہتر بنانے کے لیے 1500 الیکٹرک بسوں کا مکمل پلان تیار کیا جائے۔ اس کے ساتھ ساتھ ہر ڈویژن میں جدید بس ڈپو قائم کیے جائیں گے، جہاں چارجنگ اور مرمت کی مکمل سہولت موجود ہوگی۔
اجلاس میں فری ٹرانسپورٹ سروس کی کارکردگی کا بھی جائزہ لیا گیا۔ اب تک 21 مختلف روٹس پر ایک کروڑ سے زائد مسافر اس سہولت سے فائدہ اٹھا چکے ہیں، جو اس منصوبے کی کامیابی کو ظاہر کرتا ہے۔
مزید برآں، گوجرانوالہ اور فیصل آباد میں ماس ٹرانزٹ منصوبوں پر پیش رفت کا جائزہ لیا گیا اور میٹرو بس اسٹیشنز کی جلد تکمیل کی ہدایت دی گئی۔
مزید پڑھیں: ہائی سپیڈ SR 70 cc موٹر سائیکل آسان قسطوں پر دستیاب
پنجاب میں پہلی بار ماحول دوست ای ٹیکسی سروس شروع کرنے کی بھی منظوری دی گئی ہے۔ حکام کے مطابق ای ٹیکسی اسکیم کے تحت گاڑیاں مئی اور جون میں فراہم کی جائیں گی، جس سے شہریوں کو جدید اور کم خرچ سفری سہولت میسر آئے گی۔
