ابوظہبی: متحدہ عرب امارات کی مشہور تحقیقی جامعہ ‘خلیفہ یونیورسٹی’ نے پاکستانی طلبہ کے لیے مکمل فنڈڈ اسکالرشپس دینے کا اعلان کر دیا ہے۔ یہ وظائف ماسٹرز اور پی ایچ ڈی پروگرامز کے لیے دیے جا رہے ہیں جن کا مقصد ذہین طلبہ کو عالمی معیار کی تعلیم اور تحقیق کے مواقع فراہم کرنا ہے۔ یونیورسٹی کے مطابق یہ اسکالرشپس میرٹ کی بنیاد پر دی جائیں گی تاکہ بہترین ٹیلنٹ کو آگے آنے کا موقع مل سکے۔
خلیفہ یونیورسٹی مختلف ٹائرز یعنی درجوں میں یہ اسکالرشپس پیش کر رہی ہے۔ ان میں ٹائر 1، ٹائر 2 اور ٹائر 3 شامل ہیں، جہاں اعلیٰ درجوں میں منتخب ہونے والے طلبہ کو مکمل فنڈنگ فراہم کی جاتی ہے۔ اس اسکالرشپ کے تحت طلبہ کی 75 سے 100 فیصد تک ٹیوشن فیس معاف کر دی جائے گی۔ اس کے علاوہ ماہانہ وظیفہ، میڈیکل انشورنس، کتابوں کے اخراجات، ویزا، ہوائی جہاز کی ٹکٹیں اور رہائش جیسی سہولیات بھی دی جائیں گی۔
یہ بھی پڑھیں: امریکی جامعات میں پاکستانی طلبہ کیلئے مکمل فنڈڈ اسکالرشپ پروگرام 2027 کا آغاز
تعلیمی شعبے اور سہولیات:
کامیاب امیدواروں کو جدید لیبارٹریز اور ریسرچ سینٹرز تک رسائی ملے گی۔ یہ یونیورسٹی خاص طور پر انجینئرنگ، کمپیوٹر سائنس، مصنوعی ذہانت (AI)، توانائی اور خلائی سائنس جیسے جدید شعبوں میں تحقیق کے لیے پوری دنیا میں مشہور ہے۔ یہاں دنیا بھر سے آئے ہوئے طلبہ ایک بہترین تعلیمی ماحول میں سیکھتے ہیں۔
اہلیت کا معیار اور مطلوبہ نمبر:
اسکالرشپ حاصل کرنے کے لیے تعلیمی ریکارڈ کا مضبوط ہونا ضروری ہے۔ ماسٹرز کے لیے بیچلر میں کم از کم 3.0 سی جی پی اے ہونا چاہیے۔ پی ایچ ڈی کے لیے ماسٹرز میں 3.25 سی جی پی اے لازمی ہے، جبکہ بیچلر کے بعد براہِ راست پی ایچ ڈی کرنے والوں کے لیے 3.5 سی جی پی اے اور ‘جی آر ای’ اسکور درکار ہوگا۔ اس کے علاوہ انگریزی زبان کی مہارت ثابت کرنے کے لیے آئیلٹس یا ٹوفل کا اسکور بھی جمع کروانا ہوگا۔
درخواست کا طریقہ اور آخری تاریخ:
دلچسپی رکھنے والے طلبہ خلیفہ یونیورسٹی کی آفیشل ویب سائٹ پر جا کر آن لائن اپلائی کر سکتے ہیں۔ امیدواروں کو پہلے اکاؤنٹ بنانا ہوگا اور پھر اپنے پسندیدہ پروگرام کا انتخاب کر کے فارم مکمل کرنا ہوگا۔ یاد رہے کہ فال 2026 کے لیے درخواست جمع کروانے کی آخری تاریخ 2 مارچ 2026 ہے۔ شارٹ لسٹ ہونے والے طلبہ کو انٹرویو کے لیے بلایا جائے گا۔
ماہانہ وظیفہ کتنا ملے گا؟
وظیفے کی رقم پروگرام اور ٹائر کے حساب سے مختلف ہے۔ پی ایچ ڈی کے طلبہ کو ریسرچ یا ٹیچنگ کے ساتھ 20,000 درہم سے لے کر 40,000 درہم تک ماہانہ وظیفہ مل سکتا ہے۔ ماسٹرز کے طلبہ کے لیے وظیفہ محدود ہے لیکن وہ یونیورسٹی میں کام کر کے اضافی رقم کما سکتے ہیں۔
