اسلام آباد: وفاقی وزیر داخلہ محسن نقوی نے اوورسیز پاکستانیوں کی ملکیت پر مکمل تحفظ دینے اور جائیدادوں پر غیر قانونی قبضے کی روک تھام کے حوالے سے اہم اعلان کیا ہے۔ انہوں نے کہا ہے کہ اگر کسی اوورسیز پاکستانی نے اپنی جائیداد پر کسی بھی قسم کے قبضے کی شکایت درج کرائی تو ڈپٹی کمشنر اسلام آباد سات دن کے اندر اس شکایت پر فیصلہ کرنے کے پابند ہوں گے۔
محسن نقوی نے سوشل میڈیا پلیٹ فارم ایکس پر اپنے پیغام میں کہا کہ اوورسیز پاکستانیوں کے ملکیتی حقوق کا مکمل تحفظ کیا جائے گا اور کسی کو بھی ان کی جائیداد پر قبضہ کرنے کی اجازت نہیں دی جائے گی۔ ان کا کہنا تھا کہ حکومت اوورسیز پاکستانیوں کے اثاثوں اور سرمایہ کاری کے تحفظ کے لیے ہر ممکن اقدام اٹھا رہی ہے تاکہ ان کا اعتماد مضبوط ہو اور وہ بلا خوف و خطر سرمایہ کاری جاری رکھ سکیں۔
یہ بھی پڑھیں: وادی نیلم میں برفباری نے پانچ سال کا ریکارڈ توڑ دیا، شاہراہیں بند، لینڈسلائیڈنگ کا خطرہ
وزیر داخلہ نے مزید واضح کیا کہ اسلام آباد کیپیٹل ٹیریٹری میں اوورسیز پاکستانیوں کی سرمایہ کاری خوش آئند اور قابلِ قدر ہے۔ انہوں نے کہا کہ حکومت سرمایہ کاروں کو ایک محفوظ اور سرمایہ کار دوست ماحول فراہم کرے گی تاکہ اوورسیز پاکستانی اپنے حقوق کے تحفظ کے ساتھ ملک میں سرمایہ کاری میں دلچسپی برقرار رکھ سکیں۔
محسن نقوی نے زور دیا کہ اوورسیز پاکستانیوں کے اثاثوں کے تحفظ کے لیے تیز، شفاف اور مؤثر کارروائی کو یقینی بنایا جائے گا۔ ان اقدامات کا مقصد نہ صرف اوورسیز پاکستانیوں کے حقوق کا تحفظ ہے بلکہ ملک میں سرمایہ کاری کے ماحول کو بھی مضبوط بنانا ہے۔ وفاقی وزیر نے یقین دلایا کہ حکومت ایسے اقدامات سے سرمایہ کاروں کا اعتماد مزید مضبوط کرے گی اور کسی بھی غیر قانونی قبضے کی شکایت کو مقررہ وقت میں حل کیا جائے گا۔
