اسلام آباد (کشمیر ڈیجیٹل ) وفاقی حکومت نے دارالحکومت کی پولیس کی مجموعی کارکردگی اور استعداد بڑھانے کے لیے اہم فیصلہ کیا ہے۔ حکومت نے فیصلہ کیا ہے کہ پولیس افسران کو پاک فوج کی خصوصی کمانڈو ٹریننگ فراہم کی جائے گی تاکہ پولیس کی پیشہ ورانہ صلاحیتوں میں اضافہ ہو اور شہر کی حفاظت کے چیلنجز سے بہتر طور پر نمٹا جا سکے ۔
تفصیلات کے مطابق، پاک فوج سے دو میجرز اور 16 ایس ایس جی کمانڈوز کے تبادلے کے لیے باضابطہ درخواست کر دی گئی ہے۔ ان فوجی افسران اور کمانڈوز کو پولیس میں خالی آسامیوں پر تعینات کیا جائے گا تاکہ وہ پولیس کے آپریشنز میں براہِ راست حصہ لے سکیں اور تربیتی فرائض انجام دے سکیں ۔
مزید یہ بھی پڑھیں:ملک بھر میں بارش و برفباری، حادثات میں 2 افراد جان کی بازی ہار گئے
خصوصی طور پر، دس ایس ایس جی کمانڈوز کو نیشنل پولیس اکیڈمی میں تعینات کیا جائے گا، جہاں وہ پولیس افسران کو تربیت فراہم کریں گے اور آپریشنل معاونت بھی انجام دیں گے۔ ان کمانڈوز کا بنیادی مقصد ایس ایس پیز (اسسٹنٹ سپرنٹنڈنٹ آف پولیس) کی تربیت کرنا ہے، جو اس وقت تربیتی مراحل سے گزر رہے ہیں ۔
سرکاری دستاویزات کے مطابق، دارالحکومت میں پولیسنگ کے مسائل اور چیلنجز میں اضافہ ہو چکا ہے، اور اس صورتحال میں پولیس کی استعداد کار کو بہتر بنانے کے لیے موجودہ آپریشنز اور تربیتی اقدامات کو مزید مؤثر بنانا ضروری ہے۔ اس مقصد کے لیے پاک فوج کے تجربہ کار افسران اور ایس ایس جی اہلکاروں کی شمولیت ایک اہم قدم تصور کیا جا رہا ہے ۔
مزید یہ بھی پڑھیں:ٹی ٹوئنٹی ورلڈ کپ سے دوری، بنگلادیش کو 325 کروڑ ٹکا کا نقصان ہوسکتا ہے
ماہرین کے مطابق، اس اقدام سے نہ صرف پولیس افسران کی فنی مہارتیں اور آپریشنل صلاحیتیں بہتر ہوں گی بلکہ شہریوں کی حفاظت اور قانون نافذ کرنے والے اداروں کی مجموعی کارکردگی میں بھی بہتری آئے گی ۔ یہ منصوبہ وفاقی حکومت کی جانب سے سلامتی اور قانون کی حکمرانی کو مضبوط بنانے کی کوششوں کا حصہ ہے ۔
