آپریشن ’عزمِ استحکام‘ کے تحت سیکیورٹی فورسز نے 19 نومبر 2025 کو ضلع کرم میں دو الگ الگ انٹیلی جنس معلومات کی بنیاد پر کی جانے والی کارروائیوں میں فتنہ الخوارج کے مزید 23 دہشتگردوں کو ہلاک کر دیا ہے۔
یہ کارروائیاں اسی مربوط آپریشن کا حصہ ہیں جو ملک میں جاری دہشتگردی کے خاتمے کے لیے قومی سطح پر تشکیل دیے گئے اقدامات کے تحت کیا جا رہا ہے۔
پاک فوج کے محکمہ تعلقات عامہ (آئی ایس پی آر) نے اپنی ویب سائٹ پر جاری پریس ریلیز میں اس بات کی تصدیق کی ہے کہ مارے جانے والے تمام دہشتگردوں کا تعلق ایک ایسے گروہ سے تھا جسے بھارت کی پشت پناہی والا نیٹ ورک فتنہ الخوارج قرار دیا جاتا ہے۔ پریس ریلیز کے مطابق کارروائیوں کا آغاز اس وقت ہوا جب یہ اطلاع موصول ہوئی کہ علاقے میں شدت پسندوں کا ایک گروہ موجود ہے۔ اس معلومات کی بنیاد پر سیکیورٹی فورسز نے کارروائی کی، علاقے کو گھیرے میں لیا اور فائرنگ کے شدید تبادلے کے بعد 12 فتنہ الخوارج دہشتگردوں کو ہلاک کر دیا۔
یہ بھی پڑھیں: سنٹرل کرم میں سیکیورٹی فورسز کی کارروائیاں، 22 فتنہ الخوارج دہشتگرد ہلاک
بعد ازاں مزید انٹیلی جنس اطلاعات موصول ہونے پر اسی علاقے میں کارروائی کا دوسرا مرحلہ شروع کیا گیا۔ اس مرحلے میں بھی فتنہ الخوارج کے دہشتگردوں کا ایک اور گروہ موجود تھا جس کے خلاف سیکیورٹی فورسز نے مؤثر کارروائی کرتے ہوئے 11 مزید دہشتگردوں کو ہلاک کر دیا۔ دونوں کارروائیوں کے دوران فورسز نے علاقے کو مکمل طور پر کور کیا اور زمینی صورت حال کے مطابق آپریشنل اقدامات کیے۔
حکام کے مطابق علاقے میں سینیٹائزیشن آپریشنز اب بھی جاری ہیں تاکہ کسی بھی دیگر دہشتگردوں کی موجودگی کے امکانات کو مکمل طور پر ختم کیا جا سکے۔ یہ تمام کارروائیاں پاکستان کی جاری انسدادِ دہشت گردی مہم ’عزمِ استحکام‘ کا اہم حصہ ہیں، جسے نیشنل ایکشن پلان کے تحت فیڈرل ایپکس کمیٹی نے منظور کیا تھا۔
سیکیورٹی فورسز اور قانون نافذ کرنے والے اداروں نے واضح کیا ہے کہ غیر ملکی سرپرستی یافتہ دہشتگردی کے مکمل خاتمے تک کارروائیاں پوری رفتار سے جاری رہیں گی۔ دوسری جانب وزیراعظم پاکستان میاں شہباز شریف نے بھی سیکیورٹی فورسز کی اس کامیاب کارروائی پر ستائشی پیغام دیا ہے اور کہا ہے کہ حکومت آخری دہشتگرد کے خاتمے تک اپنی کارروائیاں جاری رکھے گی۔
یہ بھی پڑھیں: خیبر پختونخوا: سیکیورٹی فورسز کی کارروائی، 15 فتنہ الخوارج دہشتگرد ہلاک
مزید تفصیلات شدت پسندوں کی شناخت اور برآمد کیے گئے اسلحے سے متعلق علاقے کو دہشتگردوں سے پاک کرنے کے بعد جاری کی جائیں گی۔
