اسلام آباد: وزیراعظم شہباز شریف اور اردن کے فرماں روا شاہ عبداللہ دوم ابن الحسین کے درمیان ملاقات کے دوران پاکستان اور اردن نے غزہ کے باشندوں کی نقل مکانی پر کوئی سمجھوتہ نہ کرنے اور غزہ جنگ بندی پر کام کرنے والے آٹھ عرب و اسلامی ممالک سے مزید رابطے کرنے پر اتفاق کیا۔
شاہ عبداللہ دوم دو روزہ سرکاری دورے پر پاکستان آئے ہوئے ہیں۔ وزیراعظم ہاؤس پہنچنے پر مسلح افواج کے دستے نے انہیں گارڈ آف آنر پیش کیا، جبکہ وزیراعظم شہباز شریف نے پرتپاک استقبال کیا۔
رہنماؤں نے اقتصادی، تجارت، سرمایہ کاری، صحت، سائنس و ٹیکنالوجی، تعلیم اور دفاع سمیت مختلف شعبوں میں تعاون بڑھانے، علاقائی اور بین الاقوامی فورمز پر باہمی فائدہ مند تعلقات کو وسعت دینے کے عزم کا اعادہ کیا۔ وزیراعظم نے کہا کہ یہ دورہ دونوں ممالک کے درمیان دیرینہ دوستی کی عکاسی کرتا ہے اور علاقائی و بین الاقوامی سطح پر تعاون بڑھانے کا موقع فراہم کرتا ہے۔ انہوں نے مزید کہا کہ پاکستان اپنے تعلقات کو خصوصی اہمیت دیتا ہے اور علاقائی امن و استحکام سے متعلق مشترکہ مؤقف کو مضبوط بنانا چاہتا ہے۔
یہ بھی پڑھیں: چوہدری انوار الحق نے اسمبلی توڑنے سے انکار کر دیا، اصولی موقف برقرار
شاہ عبداللہ نے جاری غزہ تنازع پر اردن کی سفارتی اور انسانی کوششوں کے لیے پاکستان کی مستقل حمایت کو سراہا۔ انہوں نے غزہ کے محصور علاقے میں جنگ کے بعد استحکام کے لیے اردن کے کردار کی پاکستانی حمایت کی بھی تعریف کی، جہاں انسانی حالات بدستور خراب ہوتے جا رہے ہیں۔ دونوں رہنماؤں نے اس اصولی مؤقف کا اعادہ کیا کہ مستقبل کے کسی بھی انتظام میں فلسطینیوں کی جبری بے دخلی کی کوئی گنجائش نہیں ہونی چاہیے۔
وزیراعظم آفس کے بیان کے مطابق ملاقات میں متعدد علاقائی امور بھی زیر بحث آئے۔ وزیراعظم نے شاہ عبداللہ کو پاکستان کے پڑوسی ممالک کی حالیہ صورتحال پر بریفنگ دی، خصوصاً افغانستان میں بدلتے حالات اور بھارت کے ساتھ تناؤ کے بارے میں۔ شاہ عبداللہ نے جنوبی ایشیا میں علاقائی استحکام کے فروغ اور سیکیورٹی چیلنجز سے نمٹنے میں پاکستان کے کردار کو سراہا۔
ملاقات کے بعد ایک باضابطہ تقریب میں میڈیا، ثقافت اور تعلیم کے شعبوں میں تعاون بڑھانے کے لیے متعدد مفاہمت کی یادداشتوں پر دستخط کیے گئے، جنہیں دونوں رہنماؤں نے دیکھا۔ بعد ازاں وزیراعظم نے شاہ عبداللہ اور ان کے وفد کے اعزاز میں عشائیہ دیا۔ اردنی فرماں روا نے پرتپاک میزبانی پر تشکر کا اظہار کیا اور تعلقات کو مزید مضبوط بنانے کی خواہش کا اعادہ کیا۔
یہ بھی پڑھیں: اردن کے بادشاہ عبداللہ دوئم پاکستان پہنچ گئے، فقید المثال استقبال
ملاقات میں سینئر سول و عسکری حکام بھی موجود تھے، جن میں نائب وزیراعظم و وزیر خارجہ اسحاق ڈار، آرمی چیف فیلڈ مارشل سید عاصم منیر، وزیر اطلاعات عطا اللہ تارڑ، وزیر برائے موسمیاتی تبدیلی مصدق ملک اور دیگر اعلیٰ حکام شامل تھے۔ حکام کے مطابق یہ دورہ پاکستان اور اردن کے تعلقات کو نئی رفتار دے گا کیونکہ دونوں ممالک مشترکہ اسٹریٹجک مفادات اور دیرینہ سفارتی روابط کو مزید آگے بڑھانا چاہتے ہیں۔ شاہ عبداللہ اتوار 16 نومبر کو مزید مصروفیات کے بعد اپنا دورہ مکمل کریں گے۔
