لکی مروت: لکی مروت کے علاقے وانڈہ شیخ اللہ میں سکیورٹی فورسز نے ایک بڑی کارروائی کے دوران 8 خوارج کو ہلاک اور 5 کو شدید زخمی کر دیا ۔
سکیورٹی ذرائع کے مطابق یہ کارروائی خفیہ اطلاعات کی بنیاد پر کی گئی اور اسے انتہائی عسکری مہارت کے ساتھ انجام دیا گیا تاکہ خوارج کو فرار ہونے کا کوئی موقع نہ مل سکے ۔
ذرائع نے مزید بتایا کہ علاقے میں ممکنہ دہشت گرد عناصر کی موجودگی کے خدشات کے پیش نظر سرچ آپریشن تیزی سے جاری ہے۔ اس کارروائی کا مقصد نہ صرف ان خوارج کو ہٹانا تھا بلکہ علاقے میں امن و امان کو بحال کرنا بھی تھا ۔
سکیورٹی فورسز کا کہنا ہے کہ نیشنل ایکشن پلان کے تحت دہشت گردوں کے خاتمے اور شہریوں کی حفاظت تک ملک دشمن عناصر کے خلاف کارروائیاں جاری رہیں گی ۔
مزید یہ بھی پڑھیں:سکیورٹی فورسز کا بڑا آپریشن: 19 دہشتگرد ہلاک، لیفٹیننٹ کرنل سمیت11 جوان شہید
یہ کارروائی خاص طور پر اس وقت کی گئی جب سکیورٹی فورسز کو خوارج کے ممکنہ حملوں کے بارے میں خفیہ اطلاعات موصول ہوئیں ۔
فورسز نے علاقے کے داخلی اور خارجی راستوں کو کنٹرول میں رکھتے ہوئے آپریشن کو کامیابی سے مکمل کیا ، جس میں خوارج کو گرفتار کرنے یا فرار ہونے کا کوئی موقع نہ ملا ۔
سکیورٹی ذرائع نے عوام سے اپیل کی ہے کہ وہ کسی بھی مشکوک سرگرمی کی صورت میں فورسز سے رابطہ کریں تاکہ علاقے میں مکمل امن قائم رکھا جا سکے ۔
ان کا کہنا ہے کہ نیشنل ایکشن پلان کے تحت دہشت گرد عناصر کے خلاف مسلسل کارروائیاں جاری رہیں گی تاکہ ملک بھر میں امن قائم رہے ۔
اس کارروائی سے ظاہر ہو رہا ہے کہ سکیورٹی ادارے ملک میں دہشت گردی کے خلاف مسلسل اور مؤثر اقدامات کر رہے ہیں اور شہریوں کی حفاظت کو اپنی اولین ترجیح بنا رہے ہیں ۔
