اسلام آباد: وفاقی وزیر داخلہ محسن نقوی نے افغانستان کی جانب سے پاکستانی علاقوں پر بلااشتعال فائرنگ کے واقعات کی پر زور مذمت کی ہے اور کہا ہے کہ افغانستان کوبھارت کی طرح منہ توڑ جواب دیاجائیگااور وہ پاکستان کی طرف میلی آنکھ سے دیکھنے کی جرات نہیں کر سکےگا۔
اپنے بیان میں وزیرداخلہ محسن نقوی کا کہنا تھا کہ افغان فورسز کی شہری آبادی پر فائرنگ بین الاقوامی قوانین کی کھلم کھلا خلاف ورزی ہے، پاکستان کی بہادر فورسز نے فوری موثر جواب دے کر ثابت کیا ہےکہ کسی بھی اشتعال انگیزی کو قطعاً برداشت نہیں کیا جائیگا۔
وزیرداخلہ محسن نقوی کا کہنا تھا کہ پاکستان کی فورسز چوکس ہیں اور افغانستان کو اینٹ کا جواب پتھر سے دیا جا رہا ہے، افغانستان آگ و خون کا جو کھیل کھیل رہا ہے اس کے تانے بانے ہمارے ازلی دشمن سے ملتے ہیں۔
یہ بھی پڑھیں: پاک فوج کا بھرپور جواب پر افغان فورسز پسپا،پاکستان سے جوابی کارروائی روکنے کی اپیل کردی
محسن نقوی کا کہنا تھا کہ پاکستان کے عوام بہادر مسلح افواج کے ساتھ سیسہ پلائی دیوار کی طرح کھڑے ہیں، افغانستان کو بھی بھارت کی طرح منہ توڑ جواب دیا جائے گا کہ وہ پاکستان کی طرف میلی آنکھ سے دیکھنے کی جرات نہیں کر سکےگا۔
