مظفرآباد: دارالحکومت مظفرآباد کےگائوں بٹناڑہ میں اپنے حق کیلئے سڑکوں پر نکلنے والے عوام کیخلاف کارروائی، تھانہ پنچگراں میں ایف آئی آر در ج ، کریک ڈائون کرکے7کو گرفتار کر لیا گیا۔
تفصیلات کے مطابق بٹناڑا میں بنیادی حقوق کے حصول کے لیے احتجاج کرنے والے لوگوں کے خلاف پولیس نے کریک ڈاؤن شروع کر دیا۔ تھانہ پنچگراں میں مظاہرین کیخلاف ایف آئی آر درج کی گئی ہے جس میں کئی سال سے بیرون ملک مقیم شہری کا نام بھی شامل ہے۔
ابتدائی اطلاعات کے مطابق سات افراد کو گرفتار کر لیا گیا ہے،باقی مظاہرین کی گرفتاری کے لیے بھی پولیس کی ٹیمیں روانہ کر دی گئی ہیں۔
یہ بھی پڑھیں: بٹناڑہ احتجاج شدت اختیار کر گیا: پولیس کا مظاہرین پر لاٹھی چارج اور آنسو گیس کا استعمال
عوامی حلقوں کی جانب سے اس کارروائی پر تشویش کا اظہار کیا جا رہا ہے اور مطالبہ کیا جا رہا ہے کہ پرامن احتجاج کرنے والوں کو ہراساں کرنے کے بجائے ان کے مسائل سنے جائیں۔
یاد رہے کہ کچھ روزقبل بٹناڑہ میں بجلی کی عدم دستیابی پر شروع ہونے والا احتجاج شدت اختیار کر گیاتھا اور مظاہرین کی جانب سے شاہراہِ نیلم بند کرنے پر پولیس نے لاٹھی چارج اور آنسو گیس کا استعمال کیاتھا۔
یہ بھی پڑھیں: مظفرآباد کے قریب گاؤں بٹنارہ کے مکین سہولیات سے محروم، احتجاج پر مجبور
عوام کا کہنا ہے کہ بٹناڑہ آزاد کشمیر کا واحد گاؤں ہے جہاں آج تک بجلی، پانی اور اسکول جیسی بنیادی سہولیات میسر نہیں۔ مقامی لوگوں نے الزام عائد کیا کہ سیاستدان ہمیشہ جھوٹے وعدے کرتے رہے ہیں لیکن مسائل حل نہیں کئے گئے۔
