ایشین ہاکی فیڈریشن نے پاکستان اور عمان کی ٹورنامنٹ میں عدم شرکت کی تصدیق کے بعد ہاکی ایشیا کپ کا نیا شیڈول جاری کردیا۔
ٹورنامنٹ اب 27 اگست کی بجائے 29 اگست سے راجگیر بھارت میں شروع ہوگا،پول اے میں بھارت،جاپان،چین اور قازقستان کی ٹیمیں شامل ہیں۔
پول بی میں ملائیشیا،کوریا،چائنیز تائی پے اور بنگلا دیش کی ٹیمیں شامل ہونگی،ایشیا ہاکی کپ کا فائنل 7 ستمبر کو کھیلا جائے گا۔
یہ بھی پڑھیں: ایشیاہاکی کپ، پاکستان کا قومی ٹیم کو بھارت بھیجنے سے انکار
واضح رہے پاکستان ہاکی فیڈریشن (پی ایچ ایف) نے حکومت کی طرف سے ملی گائیڈ لائن کے بعد ٹیم بھارت نہ بھیجنے کا فیصلہ کیا ہے۔ پاکستان ہاکی فیڈریشن نے فیصلے سے متعلق ایشین ہاکی فیڈریشن کو آگاہ کر دیا۔
پی ایچ ایف کے مطابق قومی ٹیم کھلاڑیوں کے تحفظات و سکیورٹی کے پیش نظر بھارت میں نہیں کھیل سکتی۔
عمان نے بھی بھارت کی میزبانی میں ہونے والے ایشیا ہاکی کپ میں شرکت سے انکار کردیا تھااورعمان نے تحریری طور پر منتظمین کو آگاہ کیا تھا
عمان کی دستبرداری کے بعد قازقستان کوہاکی ایشیا کپ میں شامل کیا گیا ہے۔
