اسلام آباد:وزیراعظم آزادکشمیر چوہدری انوارالحق نےکہا ہے کہ آج پوری پاکستانی و کشمیری قوم 78 واں جشن آزادی ملی جوش و جذبے کے ساتھ منا رہی ہے ۔
جشن آزادی پر ویڈیو پیغام میں چوہدری انوارالحق نے کہا کہ آج کے دن بابائے قوم حضرت قائد اعظم محمد علی جناح کی مدبرانہ اور بے لوث قیادت میں دنیا کی سب سے بڑی نظریاتی اسلامی مملکت خداداد پاکستان معرض وجود میں آئی۔
آج ہمارا یوم آزادی اس لحاظ سے منفرد ہے، ہماری مسلح افواج نے معرکہ حق کے دوران اپنی پیشہ ورانہ صلاحیتوں کا بھرپور مظاہرہ کرتے ہوے جرآت ، بہادری اور استقامت کی داستان رقم کی۔
انہوں نے کہا کہ پاک فوج نے بھارت کو عبرتناک شکست فاش سے دوچار کیا،پاکستان کا قیام برصغیر جنوبی ایشیاء کے مسلمانوں کی اجتماعی قومی امنگوں اور آرزؤں کا مظہر ہے۔
یہ بھی پڑھیں:مافیاز کو نکیل ڈال دی اور اقربا پروری کا بھی خاتمہ کردیا ہے،وزیراعظم انوارالحق کا دعویٰ
14اگست1947 ایک تاریخ ساز دن تھا جب علامہ اقبال کے خواب کی تعبیر ہوئی ،یوم آزادی ہمارے اسلاف کی اس جدوجہد کو خراج عقیدت پیش کرنے کا دن ہے جب انہوں نے اپنے جان و مال اس وطن کی آزادی پر نثار کئے۔
انہوں نے کہا کہ پاکستان کا قیام دو قومی نظریہ کا مرہون منت ہے ، اس نظریہ کی بنیاد پر جب پہلی بار مفکر اسلام حضرت علامہ اقبال نے برصغیر کو تقسیم کر کے مسلمانوں کیلئے علیحدہ مملکت کے قیام کا تصور پیش کیا۔
علامہ اقبال نے مسلمانوں کے قومی تشخص اور اسلام کی تہذیبی اور ثقافتی اقدار اور روایا ت پر بھی خصوصی توجہ دلائی، قائد اعظم نے اس نظریہ کی بنیاد پر مسلم لیگ کو منظم کر کے برصغیر کے مسلمانوں کو ایک پرچم تلے متحد کیا۔
حضرت قائد اعظم کو اپنے مقصد کی صداقت اور مسلمان عوام کی اجتماعی فہم و فراست پر غیر متزلزل یقین و اعتماد تھا ، قائداعظم نے قرارداد پاکستان کی منظوری کے بعد صرف سات سال کے دوران تحریک پاکستان کو کامیابی سے ہمکنار کر دیا۔
وزیراعظم نے کہا کہ بھا رت مقبوضہ کشمیر کے عوام کو جبرکے زور پر دبانا چاہتا ہے مگر یہ دن ہمارے کشمیری بہن بھائیوں کے عزم و حوصلہ کو جلا بخشتا ہے۔
یہ بھی پڑھیں:جتھوں کو حکومتی نظام یرغمال بنانے کی اجازت نہیں دینگے، وزیراعظم کا ایکشن کمیٹی کو انتباہ
یہ دن کشمیریوں کو امید دیتا ہے کہ جدوجہد آزادی میں انکی جانب سے دی گئیں قربانیاں رائیگاں نہیں جائیں گی، حکومت پاکستان،پاکستانی عوام اور پاک فوج جس عزم کے ساتھ کشمیریوں کی سیاسی،اخلاقی اور سفارتی حمایت جاری رکھے ہوئے ہیں۔
ان شاءاللہ وہ دن دور نہیں جب مقبوضہ کشمیر بھارتی غیر قانونی قبضے سے آزاد ہو گا اور پوری ریاست جموں وکشمیر کا الحاق پاکستان کے ساتھ ہوگا۔پاکستان زندہ باد
