(کشمیر ڈیجیٹل)پاکستان فیلڈ مارشل سید عاصم منیر کی قیادت میں ایک نئے دور میں داخل ہو رہا ہے۔ بین الاقوامی سطح پر پاکستان کی نئی سفارتی حکمت عملی نہ صرف مؤثر ثابت ہو رہی ہے بلکہ عالمی سطح پر فیلڈ مارشل عاصم منیر کے کردار کو نئی شناخت دے رہی ہے۔
برطانوی جریدے دی اکانومسٹ کے 3 اگست کو شائع ہونے والے مضمون میں چیف آف آرمی اسٹاف فیلڈ مارشل سید عاصم منیر کو شان دار خراج تحسین پیش کیا گیا ہے، خاص طور پر ان کی پاک-امریکہ تعلقات کی بہتری کے لیے کی جانے والی کوششوں کو سراہا گیا ہے۔
مضمون کے مطابق فیلڈ مارشل سید عاصم منیر امریکی تعلقات کو ایک نئی سمت دے رہے ہیں۔ 18 جون کو وائٹ ہاؤس میں سابق امریکی صدر ڈونلڈ ٹرمپ سے ان کی نجی ملاقات کو خطے میں سفارتی تبدیلی کا آغاز قرار دیا گیا ہے۔
جریدے کے مطابق امریکا نے بھارت کو “مردہ معیشت” قرار دیتے ہوئے اس پر 25 فیصد ٹیرف عائد کیا ہے، جبکہ پاکستان کے ساتھ تجارتی معاہدے کا اعلان کرتے ہوئے صرف 19 فیصد ٹیرف لگایا گیا ہے۔ امریکا پاکستان کے ساتھ تجارت، اسلحہ اور انسدادِ دہشتگردی تعاون کی بحالی پر کام کر رہا ہے، جو جنوبی ایشیا، چین اور مشرقِ وسطیٰ میں امریکی پالیسی میں بڑی تبدیلی کا اشارہ ہے۔
دی اکانومسٹ کے مطابق ایک امریکی عہدیدار نے پاکستان کی داعش کے خلاف کارروائیوں کا بھی اعتراف کیا ہے۔ امریکا کی جانب سے پاکستان کو بکتر بند گاڑیاں اور نائٹ وژن آلات فراہم کرنے پر غور کیا جا رہا ہے، جبکہ امریکی پالیسی ساز بھارت کی تخریبی سرگرمیوں کا بھی جائزہ لے رہے ہیں۔
مضمون میں یہ بھی بتایا گیا ہے کہ عالمی سفارت کار اور سرمایہ کار براہ راست فیلڈ مارشل سے رابطے میں ہیں۔ انہوں نے چین اور خلیجی ممالک کے ساتھ متوازن تعلقات قائم رکھے ہیں۔ بھارت کے ساتھ حالیہ تنازع کے بعد فیلڈ مارشل کی مقبولیت میں مزید اضافہ ہوا ہے۔
جریدے کے مطابق غیر ملکی دباؤ کے باوجود فیلڈ مارشل نے بھارت کے خلاف مؤثر جوابی کارروائی کی، جبکہ صدر ٹرمپ کے قریبی حلقے پاکستان کے کرپٹو اور مائننگ سیکٹرز میں سرمایہ کاری میں گہری دلچسپی رکھتے ہیں۔
یہ بھی پڑھیں: جہلم ویلی میں جنگلی تیندوں کی آمد، لمنیاں کے مکین خوفزدہ
پاکستان کی نئی سفارتی حکمت عملی عالمی سطح پر فیلڈ مارشل سید عاصم منیر کے کردار کو ایک منفرد اور مؤثر شناخت دے رہی ہے۔
