پاکستان ٹیلی کمیونیکیشن کمپنی لمیٹڈ (پی ٹی سی ایل) کا ملک بھر میں انٹرنیٹ سروس سست روی کا شکار ہونے پر اہم بیان سامنے آیا ہے۔ پی ٹی سی ایل کے اعلان کے مطابق پاکستان میں انٹرنیٹ صارفین کو آئندہ ہفتے تک سست رفتار انٹرنیٹ کا سامنا کرنا پڑ سکتا ہے۔ اے اے ای ون (AAE-1) انٹرنیشنل سب بحری کیبل پر ہنگامی مرمت کے کام کے باعث 2 نومبر 2026ء تک پیک آورز (مصروف اوقات) کے دوران انٹرنیٹ کی رفتار سست ہو سکتی ہے۔
پی ٹی سی ایل کے مطابق اٹلی اور فرانس کے درمیان واقع کیبل پر مرمت کا کام باقاعدہ شروع کر دیا گیا ہے۔ کمپنی کا کہنا ہے کہ اس دوران صارفین کو بالخصوص مصروف اوقات میں انٹرنیٹ سروس میں معمولی تنزلی کا سامنا کرنا پڑ سکتا ہے۔ پی ٹی سی ایل نے اس مرمتی کام کے دوران تمام صارفین سے صبر اور تعاون کی اپیل کی ہے۔
اے اے ای ون (AAE-1) کیبل کی اہمیت:
ایشیا-افریقہ-یورپ 1 (AAE-1) کیبل پاکستان کے بین الاقوامی انٹرنیٹ ٹریفک کے اہم ترین روٹس میں سے ایک ہے۔ تقریباً 25,000 کلومیٹر طویل یہ سسٹم جنوب مشرقی ایشیا کو مصر کے راستے یورپ سے ملاتا ہے اور پاکستان میں کراچی کے مقام پر لینڈ کرتا ہے۔
یہ بھی پڑھیں: 5لاکھ طلباءوطالبات کیلئے کروم بکس اور انٹرنیٹ فراہمی کا آغاز
پی ٹی سی ایل نے 2017ء میں اس کے پاکستانی آپریشنز کا باقاعدہ آغاز کیا تھا۔ یہ کیبل یونان، اٹلی اور فرانس میں لینڈنگ پوائنٹس کے ذریعے ملک کو یورپ سے جوڑتی ہے۔
صارفین پر اثرات اور ماضی کے واقعات:
چونکہ مرمت کا یہ کام کیبل کے یورپی حصے پر جاری ہے، اس لیے صارفین کو یورپی ممالک میں ہوسٹ ہونے والی ویب سائٹس اور سروسز تک رسائی کے دوران شام کے مصروف اوقات میں انٹرنیٹ کی رفتار سست محسوس ہونے کا زیادہ امکان ہے۔
واضح رہے کہ یہ پہلا موقع نہیں ہے جب اے اے ای ون کیبل میں خرابی یا مرمت کے باعث پاکستان میں انٹرنیٹ صارفین کو مشکلات کا سامنا کرنا پڑا ہو۔ جنوری 2025ء میں بھی اس کیبل میں قطر کے قریب ایک خرابی پیدا ہوئی تھی، جس کی وجہ سے پورے ملک میں تقریباً دو ہفتے تک انٹرنیٹ سست رفتار رہا تھا، جس کے بعد پی ٹی سی ایل نے اس خرابی کو دور کرنے کا اعلان کیا تھا۔ تاہم، موجودہ مرمتی کام کے دوران اضافی بیک اپ بینڈ وڈتھ فراہم کرنے کے حوالے سے کمپنی کی جانب سے فی الحال کوئی بیان جاری نہیں کیا گیا ہے۔
