اسلام آباد: استحکام پاکستان پارٹی ( آئی پی پی ) اب بلدیاتی انتخابات کی تیاریوں اور نئی تنظیم سازی ساتھ میدان میں اترنے کو تیار ہے۔
میڈیا نمائندوں سے گفتگو کرتے ہوئے استحکام پاکستان پارٹی آزاد کشمیر کے سینئر رہنما اور سابق وزیر حکومت علی شان سونی نے کہا کہ استحکام پاکستان پارٹی آزاد کشمیر بھر میں آئندہ بلدیاتی انتخابات میں بھرپور انداز میں حصہ لے گی، جس کے لیے پارٹی کی تنظیم سازی کا عمل شروع کیا جائے گا
انہوں نے کہا کہ تمام 10 اضلاع میں وارڈ کی سطح سے لے کر ضلعی سطح تک تنظیمی ڈھانچے کو فعال اور مضبوط بنانے کے ساتھ عوامی حمایت، سیاسی ساکھ، سماجی خدمات اور مقامی مسائل سے آگاہی رکھنے والے متحرک امیدواروں کا انتخاب کیا جائے گا۔
یہ بھی پڑھیں:پونچھ ڈویژن سے درجنوں افراد آئی پی پی میں شامل،الیکشن میں بھرپور انٹری دینگے،سردار تنویر الیاس
انہوں نے میڈیا نمائندگان سے گفتگو میں کہا کہ استحکام پاکستان پارٹی بلدیاتی انتخابات کو محض انتخابی سرگرمی نہیں بلکہ اقتدار اور اختیار کو حقیقی معنوں میں عوام کی دہلیز تک منتقل کرنے، مقامی مسائل کے حل، عوامی نمائندگی کو مؤثر بنانے اور جمہوری اداروں کو مضبوط کرنے کا اہم ذریعہ سمجھتی ہے۔
استحکام پاکستان پارٹی آزاد کشمیر اس عزم کے ساتھ انتخابی میدان میں اترے گی کہ عوام کے اعتماد پر پورا اترنے والے ایسے نمائندے سامنے لائے جائیں جو اپنے اپنے علاقوں میں عوام کی آواز بنیں اور ترقیاتی عمل میں فعال کردار ادا کر سکیں۔
علی شان سونی نے کہا کہ آزاد کشمیر میں تقریباً 32 سال بعد بلدیاتی انتخابات کا انعقاد ایک اہم جمہوری پیش رفت تھی، جس کا سہرا پارٹی صدر سردار تنویر الیاس خان کو جاتا ہے، جنہوں نے اپنے دورِ حکومت میں مختلف دباؤ اور مشکلات کے باوجود اختیارات کی نچلی سطح پر منتقلی کے لیے بلدیاتی انتخابات کے انعقاد کو یقینی بنایا۔
ان کے بقول، اس اقدام کا بنیادی مقصد مقامی سطح پر عوام کو بااختیار بنانا، ترقیاتی فیصلوں میں منتخب نمائندوں کی شمولیت بڑھانا اور عوامی مسائل کے حل کے لیے ایک مؤثر بلدیاتی نظام کی بنیاد فراہم کرنا تھا۔
انہوں نے کہا کہ بلدیاتی ادارے جمہوری نظام کی بنیاد اور عوامی خدمت کا اہم ذریعہ ہیں، کیونکہ مقامی نمائندے اپنے علاقوں کے مسائل، ضروریات اور ترجیحات سے براہِ راست واقف ہوتے ہیں۔ روزگار، سڑکوں، گلیوں، نکاسی آب، پینے کے پانی، صفائی، تعلیم، صحت اور دیگر بنیادی سہولتوں سے متعلق مسائل کا مؤثر حل اسی صورت ممکن ہے جب منتخب بلدیاتی نمائندوں کو مناسب اختیارات، وسائل اور انتظامی تعاون فراہم کیا جائے
علی شان سونی نے کہا کہ سردار تنویر الیاس خان کے دورِ حکومت میں بلدیاتی انتخابات کے انعقاد سے عوام کو مقامی سطح پر اپنی قیادت منتخب کرنے کا موقع ملا اور بلدیاتی نمائندگی کے ذریعے اختیارات کی منتقلی کے تصور کو عملی شکل دینے کی کوشش کی گئی۔
انہوں نے کہا کہ پارٹی بلدیاتی اداروں کے کردار کو مزید مؤثر بنانے، منتخب نمائندوں کے مسائل اجاگر کرنے اور عوامی ضروریات کو ترقیاتی منصوبہ بندی کا حصہ بنانے کے لیے اپنا کردار ادا کرے گی۔
ان کے مطابق، عوام اور بلدیاتی نمائندوں کی جانب سے سردار تنویر الیاس خان کی قیادت اور ان کے دورِ حکومت میں کیے گئے اقدامات کو سراہا جانا اس امر کی عکاسی کرتا ہے کہ مقامی سطح پر اختیارات اور عوامی نمائندگی کا معاملہ آزاد کشمیر کی سیاست میں اہمیت رکھتا ہے۔
یہ بھی پڑھیں:آئی پی پی ممبر گلگت بلتستان اسمبلی امام مالک کی رکنیت معطل
سابق وزیر حکومت نے کہا کہ استحکام پاکستان پارٹی کی مرکزی قیادت، بانی چیئرمین و وفاقی وزیر عبدالعلیم خان اور صدر استحکام پاکستان پارٹی آزاد کشمیر سردار تنویر الیاس خان کی قیادت میں پارٹی نے مختصر وقت میں اپنی تنظیمی اور سیاسی موجودگی کو نمایاں کرنے کی کوشش کی۔
انہوں نے گزشتہ عام انتخابات کا حوالہ دیتے ہوئے کہا کہ پولنگ کے دن سے تقریباً 36 گھنٹے قبل پارٹی ٹکٹوں کی تقسیم کا عمل شروع ہونے کے باوجود مختلف علاقوں سے سیاسی رہنماؤں اور امیدواروں کی شمولیت نے سیاسی حلقوں میں توجہ حاصل کی۔
ان کے بقول، پارٹی قیادت نے مختلف حلقوں میں عوامی رابطے، سیاسی ساکھ اور مقامی حمایت رکھنے والی شخصیات کو اپنے پلیٹ فارم پر جمع کرکے انتخابی سیاست میں اپنی موجودگی کا احساس دلایا۔
علی شان سونی نے کہا کہ آئندہ بلدیاتی انتخابات کے لیے پارٹی گزشتہ تجربات کو سامنے رکھتے ہوئے زیادہ منظم، جامع اور مربوط حکمت عملی اختیار کرے گی، تاکہ امیدواروں کے انتخاب، تنظیمی رابطوں، عوامی مشاورت اور انتخابی تیاریوں کو بروقت مکمل کیا جا سکے۔
شان سونی نے اس عزم کا اظہار کیا کہ پارٹی عوامی حمایت حاصل کرنے، کارکنوں کو متحرک کرنے اور آزاد کشمیر کے ہر ضلع میں انتخابی سرگرمیوں کو منظم بنانے کے لیے بھرپور کردار ادا کرے گی۔
