مظفر آباد :وزیراعظم آزادکشمیر چوہدری انوار الحق کی زیر صدارت اجلاس میں کیڈٹ کالج پلندری کیلئے 34 ملین روپے کی اضافی رقم ،کیڈٹ کالج مظفر آباد کے ڈیلی ویجز ملازمین کی تنخواہیں بڑھانے کی منظوری دیدی گئی۔
تفصیلات کے مطابق وزیراعظم آزادکشمیر چوہدری انوار الحق کی زیر صدارت کیڈٹ کالج پلندری اور کیڈٹ کالج مظفر آباد کے 31 ویں بورڈ آف گورنرز کا اجلاس منعقد ہوا ۔
اجلاس میں سپیکر آزادکشمیر اسمبلی چوہدری لطیف اکبر ، چیف سیکرٹری فلائٹ لیفٹیننٹ (ر) خوشحال خان ، سیکرٹری مالیات اسلام زیب ، سیکرٹری ہائر ایجوکیشن چوہدری محمد طیب ، پرنسپل کیڈٹ کالج مظفر آباد اور دیگر متعلقہ حکام نے شرکت کی ۔
اجلاس میں وزیراعظم آزادکشمیر چوہدری انوار الحق کو سیکرٹری ہائر ایجوکیشن چوہدری محمد طیب نے کیڈٹ کالجز بارے تفصیلی بریفنگ دی۔
یہ بھی پڑھیں: وزیراعظم انوارالحق سے چیئرمین ضلع کونسل طیب منظور کیانی کی ملاقات ، بلدیاتی مسائل حل کی یقین دھانی
کیڈ ٹ کالج پلندری اور کیڈٹ کالج مظفر آباد کے بورڈ آف گورنرز کے اجلاس نے پرنسپل کیڈٹ کالج پلندری کی تعیناتی کی منظوری دی ۔
بورڈ آف گورنرز نے کیڈٹ کالج پلندری کے لیے 34 ملین روپے کی اضافی رقم کی منظوری بھی دی ، اجلاس میں کیڈٹ کالج مظفر آباد کے ڈیلی ویجز ملازمین کی تنخواہیں بڑھانے کی بھی منظوری دی گئی۔
علاوہ ازیں کیڈٹ کالجز کے جملہ مسائل کے حل کے لئے اقدامات اٹھانے کی ہدایت بھی کی گئی۔
یہ بھی پڑھیں : انوارالحق کا مزید رہنا ریاست کیلئے خطرناک، آزادکشمیر میں ان ہائوس تبدیلی لانا ہوگی، سردار تنویر الیاس
اس موقع پر وزیراعظم نے کیڈٹ کالجز کے معیار کو برقرار رکھنے کی ہدایت کی اور کہا کہ کیڈٹ کالجز کے معیار کو مزید بہتر بنانے کیلئے حکومت تمام دستیاب وسائل بروئے کار لائے گی۔
ٹیکنالوجی کے فروغ کے لیے اقدامات اٹھائیں گے ، نوجوان نسل کو زیور تعلیم سے آراستہ کریں گے تو دنیا سے مقابلہ کر سکیں گے ، تعلیم کا معیار بہتر ہو گا تو نوجوان نسل دنیا میں اپنی بہترین پہچان منوانے میں کامیاب ہو سکے گی۔
انہوں نے کہا کہ حکومت عوامی فلاح کے لیے متحرک ہے ، خدمت کے مشن کو جاری رکھنے کے لیے انقلابی اقدامات اٹھارہے ہیں ، کیڈٹ کالجز کے جملہ مسائل کے حل کیلئے بھی بھرپور اقدامات اٹھائیں گے ۔
