اسلام آباد(کشمیر ڈیجیٹل) پاکستان اٹامک انرجی کمیشن فاؤنڈیشن نے اپنے پانچویں ہائیڈرو پاور پلانٹ، فاؤنڈیشن ہائیڈل پاور پلانٹ یونٹ05 (FHPP-05) کے قیام کیلئے معاہدے پر دستخط کر دیئے ہیں۔
5 میگاواٹ کا یہ منصوبہ چشمہ-5 نیوکلیئر پاور پلانٹ کے آؤٹ فال پر تعمیر کیا جائے گا۔ منصوبہ فعال ہونے کے بعد قومی گرڈ کیلئے سالانہ تقریباً 30.66 ملین کلو واٹ آور صاف بجلی پیدا کرے گا۔
مزید یہ بھی پڑھیں:لیفٹیننٹ جنرل (ر) نعمان محمود مکہ مشترکہ دفاعی معاہدے کے پہلے سیکرٹری جنرل مقرر،ترجمان دفتر خارجہ
یہ منصوبہ سائٹ پر موجود پن بجلی کی استعداد سے استفادہ کرے گا، جس سے آبی وسائل کے مؤثر استعمال اور پائیدار بجلی کی پیداوار میں معاونت ملے گی۔
اس منصوبے سے بجلی کی پیداوار ستمبر 2029 تک شروع ہونے کی توقع ہے۔
معاہدے پرپاکستان اٹامک انرجی کمیشن ہیڈکوارٹرز میں پاکستان اٹامک انرجی کمیشن فاؤنڈیشن ، چائنا اوشن انجینئرنگ کنسٹرکشن کارپوریشن لمیٹڈ، ننگبو واٹر کنزروینسی اینڈ ہائیڈرو پاور پلاننگ اینڈ ڈیزائن انسٹی ٹیوٹ کمپنی لمیٹڈ اور حبیب رفیق انجینئرنگ (پرائیویٹ) لمیٹڈ کے درمیان مشترکہ منصوبے پر دستخط ہوئے۔
مزید یہ بھی پڑھیں:کشمیر کونسل کی 4 خالی نشستوں پر انتخابات کا شیڈول جاری، پولنگ 12 اکتوبر کو ہوگی
یہ منصوبہ پاکستان کے توانائی کے شعبے میں پاکستان اٹامک انرجی کمیشن کے وسیع تر کردار کو مزید تقویت دے گا۔
واضح رہے کہ پاکستان اٹامک انرجی کمیشن کے چھ نیوکلیئر پاور پلانٹس اس وقت قومی گرڈ کو مجموعی طور پر 3,530 میگاواٹ صاف، پائیدار اور کم لاگت بجلی فراہم کر رہے ہیں
جبکہ نیا ہائیڈرو پاور منصوبہ پاکستان اٹامک انرجی کمیشن فاؤنڈیشن کے قابلِ تجدید توانائی کے منصوبوں کے دائرہ کار کو مزید وسعت دے گا اور 5 میگاواٹ صاف بجلی کا اضافہ کرے گا۔
