کاغان، ناران اور کالام میں موسمِ سرما کی پہلی برفباری، پہاڑوں نے سفید چادر اوڑھ لی

تازہ ترین, موسم / / By

اسلام آباد(کشمیر ڈیجیٹل) خیبر پختونخوا کے سیاحتی اور بالائی علاقوں کاغان، ناران اور سوات کی حسین وادی کالام میں موسمِ سرما کی پہلی برفباری کا سلسلہ شروع ہوگیا ۔

جس کے بعد بلند و بالا پہاڑوں نے سفید چادر اوڑھ لی ہے۔ برفباری کے باعث علاقے کا قدرتی حسن مزید نکھر گیا جبکہ درجہ حرارت میں کمی کے ساتھ سردی کی شدت میں بھی نمایاں اضافہ ہوا ہے۔

کاغان اور ناران کے بالائی علاقوں میں وقفے وقفے سے برفباری کا سلسلہ جاری ہے۔ جس کے باعث پہاڑوں کی چوٹیوں، ڈھلوانوں اور مختلف مقامات پر برف کی تہہ جمنا شروع ہوگئی ہے۔

مزید یہ بھی پڑھیں:بالائی علاقوں میں طوفانی بارشیں،اربن فلڈنگ ، لینڈ سلائیڈنگ کا امکان، محکمہ موسمیات

برفباری کے بعد وادی کا منظر انتہائی دلکش ہوگیا ہے اور ہر طرف سفیدی پھیل گئی ہے۔ادھر سوات کی معروف وادی کالام اور اس کے گرد و نواح میں بھی موسم کی پہلی برفباری نے سردی کی شدت میں اضافہ کردیا ہے۔

کالام کے بلند پہاڑی سلسلے اور بالخصوص میانکیال پیک پر برف پڑنے سے پہاڑوں نے سفید چادر اوڑھ لی ہے، جبکہ برف سے ڈھکی چوٹیوں کا منظر سیاحوں کے لیے خصوصی کشش کا باعث بن گیا ہے۔

مقامی ذرائع کے مطابق بالائی علاقوں میں برفباری کے بعد ٹھنڈی ہواؤں کا سلسلہ بھی تیز ہوگیا ہے، جس سے نہ صرف بالائی بلکہ میدانی علاقوں میں بھی سردی کی شدت محسوس کی جارہی ہے۔

مزید یہ بھی پڑھیں:سیاحوں کیلئے جنت کا ٹکڑا، وادیِ لیپہ میں چھپا پتھری بیلا قدرتی حسن کا شاہکار

صبح اور رات کے اوقات میں درجہ حرارت مزید کم ہونے سے شہریوں نے گرم کپڑوں اور دیگر حفاظتی اقدامات کا استعمال بڑھا دیا ہے۔

موسمِ سرما کی پہلی برفباری نے ان علاقوں میں سیاحتی سرگرمیوں کے حوالے سے بھی نئی امید پیدا کردی ہے۔

برف سے ڈھکے پہاڑ، سفید وادیوں اور برفباری کے دلکش مناظر موسمِ سرما میں سیاحوں کے لیے خاصی کشش رکھتے ہیں۔

تاہم بالائی علاقوں کا رخ کرنے والے سیاحوں کو موسم کی صورتحال، سڑکوں کی حالت اور مقامی انتظامیہ کی ہدایات کو مدنظر رکھنے کی ضرورت ہے۔

Must Read