آزاد جموں و کشمیر کے 17ویں وزیر اعظم کے انتخاب کا باضابطہ شیڈول جاری کر دیا گیا ہے۔ آزاد کشمیر قانون ساز اسمبلی کے سیکرٹریٹ کی جانب سے جاری کردہ اعلان کے مطابق نئے وزیر اعظم کے انتخاب کا تمام تر عمل 27 اگست کو قانون ساز اسمبلی میں منعقد ہوگا، جس کے ساتھ ہی اسمبلی کا یہ اہم سیاسی مرحلہ مکمل ہو جائے گا۔
وزیر اعظم کے انتخاب کے لیے تمام تر قانونی کارروائی اور مراحل قانون ساز اسمبلی کے سیکرٹریٹ میں ہی مکمل کیے جائیں گے۔
کاغذاتِ نامزدگی، جانچ پڑتال اور فہرستوں کے اوقات:
سیکرٹریٹ کے مطابق 27 اگست کو صبح 9:30 سے 10:30 بجے تک کاغذاتِ نامزدگی جمع کرائے جا سکیں گے۔ جس کے بعد صبح 10:30 سے 10:45 بجے تک ان کاغذات کی جانچ پڑتال کی جائے گی، اور جانچ پڑتال کا عمل مکمل ہوتے ہی صبح 11 بجے امیدواروں کی ابتدائی فہرست آویزاں کر دی جائے گی۔
یہ بھی پڑھیں: شاہ غلام قادر کا نام آزاد کشمیر کے وزیراعظم کے طور پر سامنے آگیا
کاغذات کی واپسی اور حتمی انتخاب:
کاغذاتِ نامزدگی واپس لینے کے لیے صبح 11 بجے سے 11:30 بجے تک کا وقت مقرر کیا گیا ہے۔ اس کے بعد دوپہر 12 بجے امیدواروں کی حتمی فہرست آویزاں کی جائے گی، جبکہ دوپہر 12 بجے ہی قائدِ ایوان یعنی وزیر اعظم آزاد کشمیر کے انتخاب کے لیے اسمبلی میں پولنگ کا مرحلہ شروع ہوگا۔
