اسلام آباد: ملک میں پیٹرولیم مصنوعات کی موجودہ قیمتوں کی مدت ختم ہونے کے بعد آج رات پیٹرول اور ہائی اسپیڈ ڈیزل کے نئے نرخوں کا حتمی فیصلہ کیا جائے گا۔ عالمی مارکیٹ میں خام تیل کی قیمتوں میں کمی کے باعث عوام کے لیے پیٹرول اور ڈیزل کی قیمتوں میں معمولی ریلیف کا امکان پیدا ہوا ہے۔
عالمی مارکیٹ اور قیمت سازی کے عوامل:
نئی قیمتوں کا تعین کرتے وقت عالمی منڈی میں خام تیل کی صورتحال، ڈالر کے مقابلے میں روپے کی قدر اور درآمدی لاگت جیسے اہم اجزا کو مدنظر رکھا جائے گا۔ اس وقت برینٹ خام تیل 93 ڈالر فی بیرل جبکہ ڈبلیو ٹی آئی (WTI) 85 سے 86 ڈالر فی بیرل کی سطح پر ٹریڈ ہو رہا ہے۔
یہ بھی پڑھیں: حکومت نے پیٹرول اور ڈیزل کے ڈیلرز مارجن میں بڑا اضافہ کر دیا
ممکنہ قیمتوں کا اندازہ:
موجودہ عالمی ریٹس اور روزانہ کی بنیاد پر قیمت سازی کے طریقہ کار کو مدنظر رکھتے ہوئے پیٹرول کی قیمت میں 1 سے 3 روپے فی لیٹر جبکہ ہائی اسپیڈ ڈیزل کی قیمت میں 2 سے 4 روپے فی لیٹر کمی کی گنجائش دکھائی دیتی ہے۔
اور پڑھیں: سرحد یونیورسٹی واقعہ: پاک فوج نے نوٹس لے لیا، آرمڈ فورسز کے آفیسر کے خلاف مقدمہ درج
اگر عالمی نرخ برقرار رہتے ہیں تو پیٹرول کی قیمت فی لیٹر 339 سے 340.50 روپے اور ڈیزل کی قیمت 364 سے 366 روپے کے درمیان آ سکتی ہے۔ فی الوقت ملک میں پیٹرول 341.59 روپے اور ڈیزل 368.29 روپے فی لیٹر فروخت ہو رہا ہے۔
اوگرا کا حتمی نوٹیفکیشن:
قیمتوں میں کمی یا تبدیلی کا حتمی فیصلہ آئل اینڈ گیس ریگولیٹری اتھارٹی (اوگرا) کے فارمولے اور حکومت پاکستان کی منظوری کے بعد کیا جائے گا، جس کا باقاعدہ نوٹیفکیشن آج رات جاری ہوگا-
