عالمی منڈی میں سونے کی قیمتوں پر دباؤ کا سلسلہ مسلسل دوسرے روز بھی جاری رہا، جس کی بنیادی وجہ امریکی فیڈرل ریزرو کی جانب سے آنے والے مہینوں میں شرح سود میں ممکنہ اضافے کے خدشات ہیں ۔
بین الاقوامی خبر رساں ادارے رائٹرز کی جاری کردہ تازہ رپورٹ کے مطابق، بین الاقوامی منڈی میں اسپاٹ گولڈ کی قیمت میں 16 ڈالر کی نمایاں کمی ریکارڈ کی گئی، جس کے بعد یہ 4,030.09 ڈالر فی اونس پر آ گئی۔
اسی طرح امریکی گولڈ فیوچرز کے سودے بھی تقریباً 16 ڈالر کمی کے ساتھ 4,033.20 ڈالر فی اونس کی سطح پر طے پائے۔
اگرچہ اگر ہفتہ وار بنیادوں پر جائزہ لیا جائے تو سونے کی قیمتیں مجموعی طور پر معمولی اضافے کی سمت گامزن ہیں لیکن امریکی مرکزی بینک کی جانب سے بلند شرح سود کے برقرار رہنے یا اس میں مزید اضافے کی توقعات نے قیمتی دھات پر دباؤ برقرار رکھا ہوا ہے۔
معاشی ماہرین اس صورتحال کی وضاحت کرتے ہوئے بتاتے ہیں کہ جب بھی شرح سود میں اضافے کا امکان پیدا ہوتا ہے، تو سرمایہ کار اپنا سرمایہ سونے جیسی غیر منافع بخش دھاتوں سے نکال کر ایسی جگہوں پر منتقل کرنے کو ترجیح دیتے ہیں جہاں سے باقاعدہ سود یا منافع حاصل ہو سکے۔
مزید یہ بھی پڑھیں:الیکٹرک بائیک خریدنا آسان، حکومت بلاسود قرض اور سبسڈی دے گی
چونکہ سونے پر کوئی سود نہیں ملتا، اس لیے شرح سود کی توقعات کے ساتھ ہی اس کی طلب میں عارضی طور پر کمی آ جاتی ہے۔
مالیاتی تجزیہ کاروں کے مطابق، اس وقت عالمی سرمایہ کاروں کی تمام تر نظریں آئندہ ہفتے ہونے والے امریکی فیڈرل ریزرو کے اہم مانیٹری پالیسی اجلاس پر مرکوز ہیں۔
اگرچہ زیادہ تر معاشی ماہرین کا ماننا ہے کہ اس اجلاس میں شرح سود کو موجودہ سطح پر ہی برقرار رکھا جائے گا، لیکن ستمبر میں ہونے والے اجلاس کے دوران شرح سود میں اضافے کے امکانات کو اب بھی کافی مضبوط سمجھا جا رہا ہے۔
ماہرینِ معیشت کا کہنا ہے کہ اگر فیڈرل ریزرو نے آئندہ اجلاس میں سخت مانیٹری پالیسی اپنانے کا اشارہ دیا تو عالمی منڈی میں سونے کی قیمتوں پر مزید دباؤ آ سکتا ہے اور اس میں مزید گراوٹ دیکھی جا سکتی ہے۔
مزید یہ بھی پڑھیں:حکومت کا بڑا تحفہ! “وزیراعظم اپنا گھر پروگرام” کا اہم اعلان
اس کے برعکس، اگر مرکزی بینک کی جانب سے کسی نرم مانیٹری پالیسی، شرح سود کو مستحکم رکھنے یا اس میں کمی کا عندیہ ملا، تو سونے کی قیمتیں ایک بار پھر تیزی سے اوپر کی جانب جا سکتی ہیں۔
