مظفرآباد: آزاد جموں و کشمیر قانون ساز اسمبلی کے انتخابات کے لیے سیاسی سرگرمیاں تیز ہو گئی ہیں، جہاں 45 حلقوں سے جمع کرائے گئے 1265 کاغذاتِ نامزدگی کی جانچ پڑتال کا عمل مکمل کر لیا گیا ہے۔ الیکشن کمیشن کی جانب سے اسکروٹنی کے عمل کے بعد مجموعی طور پر 41 امیدواروں کے کاغذاتِ نامزدگی مختلف وجوہات کی بنا پر مسترد کر دیے گئے ہیں۔
تفصیلات کے مطابق الیکشن کمیشن نے واضح کیا ہے کہ جن امیدواروں کے کاغذاتِ نامزدگی مسترد ہوئے ہیں، وہ اس فیصلے کے خلاف اپنی اپیلیں 28 جون تک دائر کر سکتے ہیں۔ الیکشن کمیشن کے ذرائع کے مطابق مستردگی کے خلاف اب تک 12 اپیلیں موصول ہو چکی ہیں، جبکہ کل تک مزید اپیلیں آنے کا امکان بھی موجود ہے۔
یہ بھی پڑھیں: پی ٹی آئی امیدوار اسمبلی بیرسٹر مسعود کالس کا الیکشن کے بائیکاٹ کا اعلان
اپیلوں پر سماعت اور حتمی فہرست کا شیڈول:
الیکشن کمیشن کے مطابق موصول ہونے والی تمام اپیلوں پر باقاعدہ سماعت کا آغاز 29 جون سے کیا جائے گا، جو 2 جولائی تک جاری رہے گا۔ اس دوران تمام دائر کردہ اپیلوں کی مکمل جانچ اور سماعت کے بعد الیکشن کمیشن کی جانب سے حتمی فیصلے جاری کر دیے جائیں گے، جس کے بعد امیدواروں کی فائنل فہرست سامنے آئے گی۔
