کشمیر سمیت ملک کے مختلف اضلاع میں آج موسم کی صورتحال میں نمایاں تبدیلی دیکھی جا رہی ہے، جہاں محکمہ موسمیات نے کشمیر اور بالائی خیبر پختونخوا میں دوپہر کے بعد گرج چمک کے ساتھ بارش کی بڑی پیشگوئی کر دی ہے۔ محکمہ موسمیات کے مطابق، اسلام آباد اور گلگت بلتستان سمیت ملک کے دیگر حصوں میں مطلع جزوی طور پر ابر آلود رہنے اور تیز ہوائیں چلنے کا امکان ہے۔
موسم میں آنے والی اس حالیہ تبدیلی کے باعث جہاں بالائی علاقوں میں بادل برسنے کی توقع ہے، وہاں کراچی اور اسلام آباد جیسے بڑے شہروں میں دن کے اوقات میں گرمی کی شدت اور ہواؤں کی رفتار میں اتار چڑھاؤ جاری رہے گا۔
یہ بھی پڑھیں:گھر بیٹھے ڈرائیونگ لائسنس بنوائیں، “دستک” ایپ کے ذریعے نئی سہولت متعارف
بالائی علاقوں میں موسم کی تازہ ترین صورتحال:
محکمہ موسمیات کی رپورٹ کے مطابق مٹک کے بالائی حصوں بالخصوص کشمیر اور بالائی خیبر پختونخوا کے مختلف اضلاع میں دوپہر کے بعد تیز ہواؤں اور گرج چمک کے ساتھ بارش کا قوی امکان ظاہر کیا گیا ہے۔ اس کے علاوہ گلگت بلتستان میں بھی مطلع جزوی طور پر ابر آلود رہنے کے ساتھ ساتھ بعض مقامات پر ہلکی اور تیز بارش کی پیش گوئی کی گئی ہے، جس سے وہاں کے موسم میں خوشگوار تبدیلی متوقع ہے۔
دوسری جانب،وفاقی دارالحکومت اسلام آباد میں آج موسم گرم اور جزوی طور پر ابر آلود رہنے کا امکان ہے، جبکہ صبح کے اوقات میں درجہ حرارت معمول سے زیادہ 26 ڈگری سینٹی گریڈ ریکارڈ کیا گیا۔ دن کے اوقات میں اسلام آباد کا درجہ حرارت بڑھ کر 34 ڈگری سینٹی گریڈ تک جانے کی توقع ہے، جبکہ شہر میں ہواؤں کی رفتار معمول سے تیز رہے گی، جو دن بھر تقریباً 11 کلومیٹر فی گھنٹہ تک چل سکتی ہے۔
کراچی میں حبس کی صورتحال اور تیز ہواؤں کا الرٹ:
صوبائی دارالحکومت کراچی میں اس وقت موسم جزوی طور پر ابر آلود اور انتہائی مرطوب (حبس زدہ) ہے۔ شہرِ قائد میں صبح کے وقت درجہ حرارت 31 ڈگری سینٹی گریڈ ریکارڈ کیا گیا، تاہم ہوا میں نمی کا تناسب 65 فیصد تک پہنچنے کے باعث گرمی کی اصل شدت 33 ڈگری سینٹی گریڈ تک محسوس کی جا رہی ہے۔
مزید پڑھیں: ملکی تاریخ میں چاروں صوبوں کے چیف سیکرٹریز کا تعلق خیبر پختونخوا سے نکلا
محکمہ موسمیات کے حکام کا کہنا ہے کہ کراچی میں اس وقت ہوائیں مغرب کی سمت سے 23 کلومیٹر فی گھنٹہ کی رفتار سے چل رہی ہیں۔ شہر میں دن کے اوقات میں بھی وقفے وقفے سے تیز ہوائیں چلنے کا امکان ظاہر کیا گیا ہے، جبکہ اتوار کے روز کراچی کا زیادہ سے زیادہ درجہ حرارت 35 سے 36 ڈگری سینٹی گریڈ کے درمیان رہنے کی توقع ہے، جس کے باعث شہریوں کو احتیاط برتنے کا مشورہ دیا گیا ہے۔
