حب کے علاقے وندر میں آدم کھنڈ کے مقام پر پیش آنے والے ایک افسوسناک ٹریفک حادثے میں 4 افراد جان کی بازی ہار گئے جبکہ3 شدید زخمی ہوگئے ۔
ریسکیو ذرائع کے مطابق حادثہ دو موٹرسائیکلوں کے درمیان تصادم کے باعث پیش آیا، جس کے نتیجے میں موقع پر ہی متعدد افراد زخمی اور بے ہوش ہوگئے ۔
اطلاع ملتے ہی ریسکیو ٹیمیں اور مقامی افراد جائے وقوعہ پر پہنچ گئے اور امدادی کارروائیاں شروع کیں۔ زخمیوں کو فوری طور پر قریبی ہسپتال منتقل کیا گیا جہاں انہیں طبی امداد فراہم کی جا رہی ہے ۔
مزید یہ بھی پڑھیں:سوات ایکسپریس وے پر ہولناک ٹریفک حادثہ، تیز رفتار وین بس سے ٹکراگئی، 16 مسافر جاں بحق
ریسکیو حکام کا کہنا ہے کہ زخمیوں میں بعض افراد کی حالت تشویشناک بتائی جا رہی ہے ۔ ذرائع کے مطابق حادثے میں جاں بحق اور زخمی ہونے والے افراد کا تعلق کراچی سے بتایا جا رہا ہے تاہم متاثرہ افراد کی شناخت اور دیگر تفصیلات جمع کی جا رہی ہیں ۔
حادثے کے بعد علاقے میں افسوس کی فضا چھا گئی جبکہ مقامی لوگوں نے ٹریفک قوانین پر عمل درآمد اور سڑکوں پر حفاظتی اقدامات بڑھانے کی ضرورت پر زور دیا۔پولیس اور متعلقہ حکام نے واقعے کی مزید تحقیقات شروع کر دی ہیں تاکہ حادثے کی اصل وجوہات معلوم کی جا سکیں ۔
حکام کے مطابق ابتدائی اطلاعات میں تیز رفتاری اور احتیاط نہ کرنا حادثے کی ممکنہ وجوہات میں شامل ہیں، تاہم حتمی رپورٹ تحقیقات مکمل ہونے کے بعد جاری کی جائے گی ۔
مزید یہ بھی پڑھیں:کوٹلی میں ٹریفک حادثہ، نوجوان لڑکی مریم موقع پر جاں بحق ، 8زخمی
مقامی شہریوں کا کہنا ہے کہ اس شاہراہ پر پہلے بھی کئی حادثات پیش آ چکے ہیں، اس لیے بہتر نگرانی، واضح اشاروں اور محفوظ ڈرائیونگ سے ایسے واقعات کی روک تھام ممکن بنائی جا سکتی ہے ۔ علاقہ مکینوں نے متاثرہ خاندانوں سے تعزیت کا اظہار کیا اور جاں بحق ہونے والے افراد کیلئے دعائے مغفرت کی ۔
