پاکستان میں جدید ٹیکنالوجی اور تیز رفتار انٹرنیٹ کے منتظر آئی فون صارفین کے لیے ایک مایوس کن خبر سامنے آئی ہے۔ ٹیکنالوجی کی عالمی شہرت یافتہ کمپنی ‘ایپل’ نے فی الحال پاکستانی مارکیٹ میں اپنے فونز پر 5G سروس فراہم کرنے سے معذرت کر لی ہے۔
میڈیا رپورٹس کے مطابق وزارت آئی ٹی اور ٹیلی کام حکام کو ایپل کی جانب سے آگاہ کیا گیا ہے کہ کمپنی فی الحال پاکستان میں 5G سپورٹ فعال نہیں کرے گی۔ ایپل حکام کا کہنا ہے کہ وہ 2027 میں پاکستانی مارکیٹ کا دوبارہ جائزہ لیں گے، جس کے بعد ہی اس سروس کی فراہمی پر غور کیا جائے گا۔ اس فیصلے نے لاکھوں آئی فون صارفین کو طویل انتظار کی سولی پر لٹکا دیا ہے۔
یہ بھی پڑھیں: پاکستان میں کن آئی فونز پر 5G فعال ہوا ہے اور کیسے؟ آئی فون صارفین کے لیے بڑی خوشخبری آگئی
بھاری ٹیکسز اور مارکیٹ کے مسائل:
ٹیکنالوجی ماہرین کا ماننا ہے کہ پاکستان میں درآمدی اسمارٹ فونز، خاص طور پر آئی فونز پر عائد بھاری ٹیکسز نے ایپل کی مقامی مارکیٹ کو بری طرح متاثر کیا ہے۔ ٹیکسوں کی زیادتی کے باعث کمپنی یہاں نئی سروسز اور فیچرز متعارف کرانے میں ہچکچاہٹ کا شکار ہے اور فی الحال اسے اپنی ترجیحات میں شامل نہیں کر رہی۔
سام سنگ کی برتری اور ٹیلی کام کمپنیوں کی تیاریاں:
ایک طرف جہاں آئی فون صارفین پریشان ہیں، وہیں دوسری جانب سام سنگ کے متعدد اسمارٹ فونز پر 5G سروس پہلے ہی دستیاب ہے۔ مقامی ٹیلی کام کمپنیاں بھی ملک میں 5G ٹیکنالوجی کے آغاز کے لیے تیزی سے کام کر رہی ہیں۔ واضح رہے کہ حکومتِ پاکستان رواں سال 507 ملین ڈالر مالیت کی 5G اسپیکٹرم نیلامی کامیابی سے مکمل کر چکی ہے، جس کا مقصد ملک میں ڈیجیٹل انقلاب لانا ہے۔
اور پڑھیں: مظفرآباد: عوامی ایکشن کمیٹی اور وفاقی وزراء کے مابین مذاکرات کا اہم دور شروع
آزمائشی سروسز اور مستقبل کی صورتحال:
ٹیلی کام حکام کا کہنا ہے کہ کئی آپریٹرز نے 5G آلات کے آرڈرز دے دیے ہیں اور مخصوص علاقوں میں آزمائشی بنیادوں پر سروسز بھی شروع کی جا چکی ہیں۔ اگرچہ دیگر اسمارٹ فون صارفین جلد اس سہولت سے مستفید ہو سکیں گے، تاہم ایپل صارفین کو 5G کی رفتار پانے کے لیے ابھی مزید تین سال تک انتظار کرنا پڑ سکتا ہے۔
کشمیر اور دور افتادہ علاقوں میں انٹرنیٹ کی صورتحال:
اس بڑی پیش رفت کے اثرات کشمیر اور دیگر دور افتادہ علاقوں پر بھی پڑنے کا امکان ہے جہاں 5G ٹیکنالوجی کی آمد سے تعلیمی اور کاروباری سرگرمیوں میں تیزی کی توقع کی جا رہی تھی۔ ماہرین کا کہنا ہے کہ آئی فون پر اس سروس کا نہ ہونا ان علاقوں کے ہائی اینڈ صارفین کے لیے ایک بڑا دھچکا ہے۔
مزید پڑھیں: پاکستان میں 5G سپیکٹرم کی نیلامی ! تیز ترین انٹرنیٹ اور نئی ٹیکنالوجی کا دور شروع
