پاک سوزوکی موٹر کمپنی نے اپنے مقبول ترین ماڈل سوزوکی GS 150 کے لیے زیرو فیصد مارک اپ (بلاسود) انسٹالمنٹ اسکیم متعارف کروا دی ہے۔ یہ اقدام ملک میں بڑھتی ہوئی مہنگائی اور گاڑیوں کی قیمتوں میں اضافے کے پیشِ نظر کیا گیا ہے تاکہ متوسط طبقے کے لیے موٹر سائیکل کی خریداری آسان بنائی جا سکے۔ 150 سی سی انجن کی حامل اس طاقتور بائیک کی موجودہ قیمت 399,900 روپے مقرر کی گئی ہے۔
کمپنی کی جانب سے جاری کردہ تفصیلات کے مطابق، گاہکوں کے لیے دو مختلف پلان پیش کیے گئے ہیں۔ پہلے پلان کے تحت 25 فیصد ایڈوانس ادائیگی (99,975 روپے) کر کے 24 ماہ کی اقساط پر بائیک حاصل کی جا سکتی ہے۔ اس دو سالہ پلان میں ماہانہ قسط 12,500 روپے ہوگی، جبکہ 24 ویں ماہ کی آخری قسط 12,425 روپے ادا کرنی ہوگی۔
یہ بھی پڑھیں: ہائی سپیڈ SR 70 cc موٹر سائیکل آسان قسطوں پر دستیاب
دوسرے آپشن میں 50 فیصد ایڈوانس ادائیگی (199,950 روپے) کے ساتھ 18 ماہ کا پلان دیا گیا ہے۔ اس اسکیم میں پہلے 17 ماہ تک ماہانہ قسط 11,200 روپے ہوگی، جبکہ آخری قسط صرف 9,550 روپے ہوگی۔ پاک سوزوکی کے مطابق یہ تمام سہولیات ملک بھر میں کمپنی کے مجاز ڈیلر شپس پر دستیاب ہیں، جس کا مقصد پیٹرول کی قیمتوں اور معاشی مشکلات کے دور میں عوام کو سستی سواری کی فراہمی میں مدد کرنا ہے۔
