خلیجی ممالک کی جنگ کے باعث ملک میں جاری توانائی بحران کے معاملے پر پنجاب حکومت نے صوبے میں اہم فیصلوں کی تیاری کر لی۔
ذرائع کے مطابق محکمہ توانائی پنجاب نے صوبائی حکومت کو نئی سفارشات بھجوا دی ہیں جس میں وفاق کی طرز پر فیول راشننگ کی تجویز دی گئی ہے۔
یہ بھی پڑھیں: کفایت شعاری پالیسی، ملازمین کی تنخواہوں میں کتنی کٹوتی ہوگی؟ تفصیلات آ گئیں
ذرائع کا کہنا ہے کہ 15اپریل تک تعلیمی اداروں میں چھٹیوں کی سفارش بھی کی گئی ہے اور اسکولوں میں ہائبرڈ نظام تعلیم پر غور کرنے کی سفارش بھی شامل ہے۔
ذرائع کا بتانا ہے کہ پیٹرول اور ڈیزل کی منصفانہ تقسیم کے لیے کوپن یا ڈیجیٹل سسٹم متعارف کرانے کی تجویز ہے، مخصوص دنوں میں محدود گاڑیوں کو ایندھن فراہم کرنے کی تجویز بھی پیش کی گئی ہے۔
ذرائع کے مطابق نجی اداروں کے لیے ورک فرام ہوم کے لیے سخت ہدایات کی سفارشات بھی تجاویز میں شامل ہیں جبکہ غیر ضروری تقریبات پر مکمل پابندی کی تجویز بھی دی گئی ہے۔
ذرائع کا کہنا ہے پنجاب حکومت سے میٹرو اور بس سروس بڑھانے کی سفارش کی گئی ہے جبکہ ایل ای ڈی بل بورڈز اور آرائشی لائٹس بند کرنے کی تجویز بھی پیش کی گئی ہے ۔
یہ بھی پڑھیں: حکومت کا ملک میں کفایت شعاری کو مزید مؤثر بنانے کیلئے نئے انتظامی فیصلوں کا اعلان
رات 10 بجے کے بعد اسٹریٹ لائٹس متبادل موڈ پر چلانے کی سفارش کی گئی ہے اور مارکیٹ اوقات کار کو مزید محدود کرنے کی تجویز بھی پیش کی گئی ہے۔
صوبہ پنجاب میں تجاویز منظور ہونے پر ملک کے دیگر صوبوں میں بھی یہی ماڈل اپنایا جا سکتا ہے اور یوں جنگ کے خاتمے تک سکولوں میں چھٹیوں سمیت معمولات زندگی متاثر ہونے کا امکان ہے۔
