وزیراعظم شہباز شریف نے وفاقی وزارت ہاؤسنگ اینڈ ورکس کے امور سے متعلق اسلام آباد میں منعقدہ ایک اہم اجلاس کی صدارت کی۔ اجلاس کے شرکاء سے گفتگو کرتے ہوئے وزیراعظم نے واضح کیا کہ کم آمدنی والے طبقے کو رہائش کی فراہمی اور سستے گھروں کے منصوبے حکومت کی اولین ترجیح ہیں۔
وزیراعظم نے متعلقہ حکام کو ہدایت جاری کی کہ گھروں کی تعمیر کے لیے قرضوں کے حصول کو آسان بنایا جائے اور اس کی سہولت عام آدمی کی پہنچ تک لانے کے لیے فوری عملی اقدامات اٹھائے جائیں۔
تعمیراتی شعبے میں اصلاحات اور ٹیکس اسٹرکچر:
اجلاس کے دوران وزارت ہاؤسنگ اینڈ ورکس کی جانب سے اسٹریٹجک روڈ میپ پر تفصیلی بریفنگ دی گئی۔ وزیراعظم کو بتایا گیا کہ تعمیراتی شعبے کو متحرک کرنے کے لیے ٹیکس اسٹرکچر میں اصلاحات لائی جا رہی ہیں۔ اس سلسلے میں ٹیکس اسٹینڈرائزیشن کے معاملے پر فیڈرل بورڈ آف ریونیو (FBR) اور صوبائی حکومتوں کے درمیان مشاورت کا عمل جاری ہے تاکہ نظام کو سادہ اور موثر بنایا جا سکے۔
یہ بھی پڑھیں: ہر پاکستانی کو عیدی ملے گی؟ حکومت کا ’پی ایم عیدی پروگرام 2026‘کا منصوبہ
ہاؤس مورٹگیج اور ریئل اسٹیٹ ریگولیٹری اتھارٹی:
بریفنگ میں مزید انکشاف کیا گیا کہ ہاؤس مورٹگیج (قرضہ حسنہ برائے ہاؤسنگ) کے حوالے سے اصلاحات کا مسودہ زیرِ غور ہے، جس کا مقصد عام شہریوں کے لیے گھر کی تعمیر کے مالی بوجھ کو کم کرنا ہے۔ اس کے علاوہ، تعمیراتی منصوبوں میں شفافیت اور عوامی اعتماد کو بڑھانے کے لیے ‘ریئل اسٹیٹ ریگولیٹری اتھارٹی’ کے قیام پر بھی کام جاری ہے۔ پبلک پرائیویٹ پارٹنرشپ کے تحت کم آمدنی والے افراد کے لیے گھروں کی تعمیر کا جامع لائحہ عمل تیار کیا جا رہا ہے تاکہ نجی شعبے کے تعاون سے اس مشن کو تیز کیا جا سکے۔
