ملکی اور عالمی گولڈ مارکیٹ میں سونے کی قیمتوں میں مسلسل کمی کا رجحان برقرار ہے اور آج مسلسل تیسرے روز بھی قیمتوں میں بڑی گراوٹ ریکارڈ کی گئی ہے۔
آل پاکستان صرافہ جیمز اینڈ جیولرز ایسوسی ایشن کے مطابق مقامی مارکیٹ میں فی تولہ سونے کی قیمت 2 ہزار 800 روپے کم ہو گئی ہے جس کے بعد نئی قیمت 5 لاکھ 37 هزار 162 روپے کی سطح پر آ گئی ہے۔ اسی طرح 10 گرام سونے کی قیمت میں بھی 2 ہزار 410 روپے کی نمایاں کمی دیکھی گئی ہے اور اب یہ 4 لاکھ 60 ہزار 529 روپے میں فروخت ہو رہا ہے۔ قیمتوں میں اس مسلسل کمی کے باعث صرافہ بازاروں میں خریداری کے رجحان میں بہتری دیکھی جا رہی ہے۔
یہ بھی پڑھیں: پاکستان میں سونا مزید ہزاروں روپے سستا: فی تولہ قیمت میں 10 ہزار روپے کی بڑی کمی
سونے کے ساتھ ساتھ چاندی کی قیمتوں میں بھی مندی کا تسلسل جاری رہا جہاں فی تولہ چاندی 194 روپے سستی ہونے کے بعد 8 ہزار 810 روپے پر آ گئی ہے۔ دوسری جانب بین الاقوامی مارکیٹ میں بھی سونے کی قیمتوں پر دباؤ برقرار رہا اور فی اونس سونا 28 ڈالر کی کمی کے ساتھ 5 ہزار 144 ڈالر کی سطح پر بند ہوا۔ معاشی ماہرین کا کہنا ہے کہ عالمی مارکیٹ میں قیمتوں کا اتار چڑھاؤ براہِ راست مقامی مارکیٹ پر اثر انداز ہو رہا ہے، جس سے عام خریداروں کو ریلیف مل رہا ہے۔
