قومی ڈیٹا بیس اور رجسٹریشن اتھارٹی (نادرا) نے شہریوں کے لیے ریئل ٹائم شناختی کارڈ مانیٹرنگ ایپ متعارف کروا دی ہے، جس کا مقصد شہریوں کو ان کی شناختی معلومات پر زیادہ کنٹرول فراہم کرنا ہے۔
اس ایپ کے ذریعے شہری اب اپنے قومی شناختی کارڈ کے ڈیٹا کے استعمال کی نگرانی کر سکیں گے، جس سے شفافیت اور سیکورٹی میں اضافہ ہوگا۔ ایپ صارفین کو مکمل تاریخ دیکھنے کی سہولت فراہم کرتی ہے کہ کس ادارے نے کس مقصد کے لیے کب ان کی شناختی معلومات تک رسائی حاصل کی۔
یہ بھی پڑھیں: شہری اب نادرا ایپ کے ذریعے اپنے بچے کی پیدائش آن لائن رجسٹر کرا سکتے ہیں
نادرا کے مطابق یہ اقدام ذاتی معلومات کے غلط استعمال کے خلاف ایک وسیع تر حکمت عملی کا حصہ ہے۔ اس ایپ کے ذریعے شناختی چوری اور دیگر غیر قانونی تصدیقات کے خطرات کو بھی نمایاں طور پر کم کیا جا سکے گا۔ یہ ترقی ذاتی معلومات کے لیک ہونے سے بچاؤ اور ڈیٹا سیکورٹی پروٹوکولز کی پابندی کے لیے ایک اہم پیش رفت ہے۔
آن لائن برتھ سرٹیفیکیٹ کی سہولت
نادرا نے پہلے ہی شہریوں کے لیے آن لائن برتھ سرٹیفیکیٹ حاصل کرنے کی سہولت بھی متعارف کروائی تھی، جس سے بچوں کی پیدائش کی رجسٹریشن کا عمل آسان ہو گیا ہے۔ نادرا کے مطابق شہری اب Pak ID موبائل ایپ کے ذریعے اپنے بچوں کی پیدائش متعلقہ یونین کونسلز (UCs) میں گھر بیٹھے رجسٹر کرا سکتے ہیں۔
نادرا کے مطابق یہ سہولت پنجاب کے تمام اضلاع میں دستیاب ہے۔ سندھ کے کئی اضلاع میں بھی یہ سہولت موجود ہے جن میں کراچی ایسٹ، سینٹرل، نوشہرو فیروز، میرپورخاص، شہید بینظیر آباد، لاڑکانہ، جامشورو، ٹنڈو اللہ یار اور ٹنڈو محمد خان شامل ہیں۔ ببلوچستان کے ضلع کوئٹہ میں بھی رجسٹریشن کی سہولت دستیاب ہے۔
یہ بھی پڑھیں: الیکشن کی تیاریاں، کوٹلی کیلئے نادرا موبائل وین کے دوروں کا شیڈول جاری
نادرا نے اعلان کیا ہے کہ جلد ہی اس سہولت کو پورے ملک میں بڑھایا جائے گا، اور اس پر کام جاری ہے تاکہ یہ سہولت تمام شہریوں کے لیے دستیاب ہو سکے۔
