جنوبی کوریا نے پاکستانی طلبہ کے لیے مکمل فنڈڈ اسکالرشپس کا اعلان کر دیا ہے، جس کے تحت پاکستان سے تعلق رکھنے والے طلبہ کو سائنس، ٹیکنالوجی، انجینئرنگ اور ریاضی (STEM) کے شعبوں میں اعلیٰ تعلیم حاصل کرنے کا موقع فراہم کیا جا رہا ہے۔
یہ اسکالرشپ پروگرام دنیا بھر کے بین الاقوامی طلبہ کے لیے کھلا ہے، جس میں پاکستانی طلبہ بھی شامل ہیں جو کوریا کی بہترین جامعات میں گریجویٹ سطح کی تعلیم حاصل کرنا چاہتے ہیں۔
اس اسکالرشپ کے لیے درخواست دینے والے امیدواروں کے پاس بیچلرز ڈگری ہونا لازمی ہے۔ عمر کی حد 40 سال سے کم مقرر کی گئی ہے جبکہ تعلیمی کارکردگی کم از کم 80 فیصد یا 4.0 میں سے 2.64 جی پی اے ہونا ضروری قرار دیا گیا ہے۔ اسکالرشپ کے تحت منتخب ہونے والے امیدواروں کو مکمل ٹیوشن فیس، ماہانہ رہائشی اخراجات، ہیلتھ انشورنس پریمیم اور سفری گرانٹ فراہم کی جائے گی۔
یہ بھی پڑھیں: ترکیہ نے آزادکشمیر کے طلبہ کیلئے پہلی بار اہم اسکالرشپس کا اعلان کردیا
یہ اسکیم بین الاقوامی صلاحیتوں کو کوریا کے جدید اور اختراعی صنعتی شعبوں میں کردار ادا کرنے کا موقع دینے کے لیے متعارف کروائی گئی ہے، تاکہ طلبہ اعلیٰ معیار کی تعلیم اور عالمی معیار کی تعلیمی نمائش حاصل کر سکیں۔ اس پروگرام کے ذریعے طلبہ کو نہ صرف تعلیمی میدان میں ترقی کا موقع ملے گا بلکہ مستقبل کے لیے عالمی سطح پر نیٹ ورک قائم کرنے میں بھی مدد ملے گی۔
پاکستانی طلبہ جو اس اسکالرشپ سے فائدہ اٹھانے کے خواہشمند ہیں، وہ اپنی درخواستیں 6 مارچ 2026 سے قبل سیول اسکالرشپ فاؤنڈیشن میں بذریعہ ای میل یا بذریعہ ڈاک جمع کرا سکتے ہیں۔ درخواست کے ساتھ جن دستاویزات کی ضرورت ہوگی ان میں تعلیمی ریکارڈ، اسٹیٹمنٹ آف پرپز، اسٹڈی پروپوزل، سفارشی خطوط اور شہریت کا ثبوت شامل ہیں۔ یہ اسکالرشپ پروگرام ان پاکستانی طلبہ کے لیے ایک اہم موقع قرار دیا جا رہا ہے جو مالی رکاوٹوں کے بغیر کوریا میں اعلیٰ تعلیم حاصل کرنا چاہتے ہیں اور اپنے مستقبل کو بین الاقوامی سطح پر مستحکم بنانا چاہتے ہیں۔
