گزرا ہوا سال 2025 پاکستان کے لیے نہایت اہم اور فیصلہ کن ثابت ہوا، جس میں جغرافیائی سیاست میں بڑی تبدیلیاں، خطے میں کشیدگی اور اندرونی سطح پر متعدد چیلنجز دیکھنے میں آئے۔
امریکہ کے ساتھ تعلقات میں بہتری سے لے کر بھارت کے ساتھ تقریباً جنگی صورتحال تک، پاکستان نے مختلف بحرانوں کا مقابلہ کرتے ہوئے اپنی سمت درست انداز میں طے کی۔
مذکورہ رپورٹ میں سال 2025 کے تجزیوں اور اہم واقعات کی روشنی میں وہ خبریں پیش کی جا رہی ہیں جن میں پاکستان کی سیاسی، سفارتی اور داخلی سلامتی کے معاملات نمایاں رہے۔
پاک امریکہ تعلقات میں بہتری:
سال 2025 میں پاکستان نے عالمی سفارت کاری میں واضح پیش رفت کی، خاص طور پر امریکی صدر ڈونلڈ ٹرمپ کے دور میں پاکستان اور امریکہ کے تعلقات میں غیر معمولی بہتری دیکھی گئی۔
وائٹ ہاؤس میں امریکی صدر ڈونلڈ ٹرمپ اور پاکستان کے آرمی چیف فیلڈ مارشل سید عاصم منیر کی ملاقات کو ’’ٹرمپ منیر قربت‘‘ قرار دیا گیا، جس نے دوطرفہ تعلقات کو سرد مہری سے نکال کر گرمجوشی کی جانب موڑ دیا۔
مئی 2025 میں بھارت اور پاکستان کے درمیان فضائی کشیدگی کے دوران پاکستان کے کردار کو امریکہ نے سراہا، جس کے بعد پاکستان نے صدر ٹرمپ کو نوبیل امن انعام کے لیے نامزد کیا۔
اسی دوران معاشی شعبے میں نایاب معدنیات اور ریفائننگ کے لیے 50 کروڑ ڈالر کے معاہدے طے پائے، جبکہ بلوچستان کے ریکوڈک منصوبے کے لیے امریکی ایکسِم بینک نے 1.25 ارب ڈالر کی فنانسنگ فراہم کی۔
چین کے ساتھ 8.5 ارب ڈالر کی سرمایہ کاری اور جے 35 جنگی طیاروں کا معاہدہ، روس کے ساتھ پاکستان اسٹیل ملز کی بحالی، سعودی عرب کے ساتھ دفاعی تعاون، آذربائیجان کے ساتھ 4.6 ارب ڈالر کا جے ایف 17 طیاروں کا معاہدہ اور بنگلہ دیش کے ساتھ تعلقات کی بحالی نے پاکستان کی خطے میں اسٹریٹجک پوزیشن کو مزید مضبوط کیا۔
یہ بھی پڑھیں: آئی سی سی پلیئرز کی نئی رینکنگ جاری ،ٹاپ ٹین میں کتنے پاکستانی شامل ہیں؟
پاک بھارت مسلح تصادم:
مئی 2025 میں بھارت کی جانب سے پہلگام حملے کے بعد ’’آپریشن سندور‘‘ کے تحت پاکستان پر میزائل حملے کیے گئے، جس کے نتیجے میں دونوں ممالک کے درمیان شدید مسلح تصادم ہوا۔
پاکستان نے بھرپور دفاعی کارروائی کرتے ہوئے فضائی محاذ پر بھارت کو بھاری نقصان پہنچایا۔ پاکستانی فضائیہ نے جدید جے 10 سی طیاروں، پی ایل 15 میزائلوں اور ایچ کیو 9 فضائی دفاعی نظام کی مدد سے 7 اور 8 مئی کو ہونے والی جھڑپوں میں بھارت کے متعدد جنگی طیارے مار گرانے کا دعویٰ کیا، جن میں رافیل طیارے بھی شامل تھے۔
پاک فوج کی حکمت عملی کے نتیجے میں بھارتی ڈرونز اور میزائلوں کی بڑی تعداد کو فضا میں ہی تباہ کیا گیا۔ اس دفاعی کامیابی کے بعد بھارت گہرائی تک پیش قدمی نہ کر سکا اور چار دن کی کشیدگی کے بعد 10 مئی کو جنگ بندی پر آمادہ ہوا۔
پاکستانی قیادت اور عالمی مبصرین، حتیٰ کہ امریکی کانگریس کی ایک رپورٹ میں بھی چین کے فراہم کردہ ہتھیاروں کے ذریعے پاکستان کی فوجی کامیابی کا ذکر کیا گیا، جسے بھارت کی جارحانہ حکمت عملی کے لیے بڑا دھچکا قرار دیا گیا۔
یہ بھی پڑھیں:پاک سعودیہ تعلقات میں اہم پیشرفت، شہزادہ محمد بن نے دورہ پاکستان کی خواہش ظاہر کردی
دہشت گردی اور داخلی سلامتی:
سال 2025 گزشتہ ایک دہائی میں پاکستان کے لیے سب سے خونریز سال رہا، جس میں دہشت گردی کے واقعات میں 3 ہزار 300 سے زائد افراد جان سے گئے۔
ہلاک ہونے والوں میں 2 ہزار 100 دہشت گرد، 664 سیکیورٹی اہلکار اور 580 عام شہری شامل تھے۔ کالعدم تحریک طالبان پاکستان (ٹی ٹی پی) کی سرگرمیاں، بلوچستان میں شورش اور 10 سے زائد بم دھماکوں نے صورتحال کو سنگین بنایا۔
مارچ میں جعفر ایکسپریس کا اغوا اور بلوچ احتجاج کے دوران سیکیورٹی اہلکاروں کی ہلاکتیں نمایاں رہیں، جبکہ سرحدی کشیدگی کے تناظر میں کابل کے قریب فضائی کارروائیاں بھی کی گئیں۔
تباہ کن سیلاب اور قدرتی آفات:
جون سے ستمبر 2025 کے دوران شدید سیلابوں نے ملک کے پانچ صوبوں کو متاثر کیا، جن میں ایک ہزار سے زائد افراد جاں بحق ہوئے، زراعت اور صنعت کو شدید نقصان پہنچا اور لاکھوں افراد بے گھر ہوئے۔
سال کے اختتام تک انفراسٹرکچر کی بحالی کا عمل جاری رہا، جس نے معیشت پر اضافی دباؤ ڈالا۔
معاشی پیش رفت:
سال 2025 میں پاکستان کی شرح نمو 2.6 فیصد رہی، جو 2024 کے مقابلے میں کم تھی۔ کمی کی بڑی وجوہات سیلاب اور سیکیورٹی مسائل قرار دی گئی۔
تاہم ڈیجیٹل معیشت میں بہتری دیکھی گئی، جہاں مالی سال 26 کی پہلی سہ ماہی میں ریٹیل ڈیجیٹل ادائیگیاں 592 ارب ڈالر تک پہنچ گئیں۔ بیجوں اور معدنیات کے شعبے میں اصلاحات اور غیر ملکی سرمایہ کاری مثبت پیش رفت سمجھی گئی۔
پی آئی اے کی نجکاری:
اپریل 2025 سے پاکستان انٹرنیشنل ایئرلائنز (پی آئی اے) نئی ملکیت میں منتقل ہوئی، جس کے بعد برطانیہ کے لیے پروازوں کی بحالی عمل میں آئی۔ یہ قدم ہوا بازی کے شعبے میں اصلاحات کا حصہ تھا۔
کھیلوں میں کامیابیاں:
سال 2025 کھیلوں کے میدان میں بھی پاکستان کے لیے یادگار رہا۔ پاکستان نے 1996 کے بعد پہلی مرتبہ آئی سی سی کے بڑے ایونٹ کی میزبانی کی۔
پاکستان نے بھارت کے خلاف سیریز 6-0 سے جیتی، لاہور قلندرز نے تیسری مرتبہ پی ایس ایل کا ٹائٹل حاصل کیا، جبکہ بابر اعظم کی 32 ویں سنچری بھی سال کی نمایاں کامیابیوں میں شامل رہی۔
اس کے علاوہ پاکستان کی انڈر 19 اور ایمرجنگ ٹیموں نے دونوں ایشیا کپ جیت کر ملک کا نام روشن کیا۔
