وزیراعظم شہباز شریف نے مشرف علی زیدی کو غیر ملکی میڈیا کیلئے نیا ترجمان مقرر کر دیا ہے، وزیراعظم آفس نے نوٹیفکیشن جاری کردیا ۔
نوٹیفکیشن کے مطابق مشرف علی زیدی کی تقرری فوری طور پر نافذ العمل ہوگی اور اگلے احکامات تک برقرار رہے گی ۔
وزارت اطلاعات و نشریات اور کابینہ ڈویژن کو مزید کارروائی کی ہدایت بھی جاری کی گئی ہے اس کے ساتھ ہی وزیراعظم آفس نے 4 جون اور 10 جون کے سابق احکامات منسوخ کر دیے ہیں ۔
وزیراعظم کی جانب سے مشرف علی زیدی کی تقرری کا مقصد بین الاقوامی سطح پر پاکستان کے موقف کو واضح اور مؤثر انداز میں پیش کرنا بتایا گیا ہے ۔
مشرف علی زیدی پالیسی تجزیہ اور عوامی وکالت کے کام کے لیے جانے جاتے ہیں، خاص طور پر تعلیم، عوامی پالیسی اور ٹیکنالوجی کے شعبوں میں ماہر ہیں ۔
مزید یہ بھی پڑھیں:آزادیِ صحافت کے تحفظ اور صحافیوں کو محفوظ ماحول فراہم کرنے کیلئے پُرعزم ہیں،وزیر اعظم شہباز شریف
مسلم لیگ ن کی حکومت نے جون 2025 کو مشرف علی زیدی کو وزیر اعظم کے دفتر میں چیف کوآرڈینیٹر برائے گورنمنٹ پرفارمنس اینڈ انوویشن کے عہدے پر تعینات کیا تھا ۔
مشرف علی زیدی کی تعیناتی کا مقصد حکومتی کارکردگی کی نگرانی اور نئے طریقہ کار متعارف کروانے میں اعلیٰ سطح پر رابطہ کار کا کردار ادا کرنا تھا ۔
ان کی اس تقرری پر سوشل میڈیا پر زبردست مباحثہ چھڑ گیا تھا اور صارفین مختلف زاویوں سے اس پر اپنے خیالات کا اظہار کر رہے تھے ۔
