(کشمیر ڈیجیٹل) نائب صدر پاکستان تحریکِ انصاف، آزاد جموں و کشمیر سید ذیشان حیدر نے کہا ہے کہ قوم کی جانب سے پاک آرمی اور پاک فضائیہ کے بہادر جوانوں کو دل کی گہرائیوں سے سلام پیش کیا جاتا ہے۔ انہوں نے کہا کہ ہماری افواج نے ہمیشہ سرحدی سالمیت، قومی سلامتی اور شہری جانوں کے تحفظ کو اپنی اولین ذمہ داری بنایا ہے اور قوم ہمیشہ ان کے شانہ بشانہ کھڑی رہی ہے۔
انہوں نے کہا کہ بدقسمتی سے ہماری مہمان نوازی اور حسنِ سلوک کا بار بار دشمنی اور جارحیت کے ساتھ جواب دیا گیا ہے۔ بارہا کی جانے والی درخواستوں کے باوجود خاص طور پر افغان سرزمین کے استعمال کے ذریعے دہشت گردوں کو ہتھیار، تربیت اور سازوسامان فراہم کرنے کے معاملے پر ہماری بات کو جان بوجھ کر نظر انداز کیا گیا۔ اس کا خمیازہ ہم روزانہ اپنے شہداء کی صورت میں ادا کر رہے ہیں۔ ہر دن ہم اپنے بہادر جوانوں اور شہداء کو قومی پرچم میں لپیٹ کر انہیں سلام پیش کرتے ہیں، مگر اب یہ سلسلہ مزید جاری نہیں رہ سکتا۔
کرم ایجنسی سمیت دیگر سرحدی علاقوں میں مقامی قبائلی عمائدین اور شہریوں نے مسجدوں میں اعلانات کے بعد اپنی جانیں نچھاور کرتے ہوئے پاک فوج کے شانہ بشانہ چوکیوں پر حاضری دی۔ یہ قوم کا غیر معمولی جذبہ حب الوطنی اور افواجِ پاکستان کے ساتھ مکمل یکجہتی کی روشن مثال ہے جسے ہم دل کی گہرائیوں سے سراہتے ہیں۔
پاکستان واضح طور پر مطالبہ کرتا ہے کہ افغان قیادت اپنی سرزمین کو کسی بھی غیر ریاستی مسلح گروہ کی سرگرمی کے لیے استعمال نہ ہونے دے۔ کابل کو فوری طور پر ٹی ٹی پی اور دیگر دہشت گرد عناصر کی ہر قسم کی حمایت ختم کرنی چاہیے ورنہ ان کے ٹھکانوں پر مؤثر اور شدید جوابی کارروائیاں جاری رکھی جائیں گی۔ پاک فضائیہ کی حالیہ کارروائیوں نے دہشت گردوں اور ان کے ممکنہ حمایت کاروں کو بھاری نقصان پہنچایا ہے جو ایک واضح پیغام ہے کہ پاکستان اپنی سرحدوں اور عوام کی حفاظت میں کسی قسم کی رعایت برداشت نہیں کرے گا۔
پاکستان ہمیشہ امن، بات چیت اور ڈپلومیسی کا قائل رہا ہے۔ پاک-افغان ڈائیلاگ کو از سر نو فعال کرنا خطے میں دیرپا امن کے لیے ناگزیر ہے۔ تاہم یہ بھی واضح ہے کہ مذاکرات تبھی معنی رکھتے ہیں جب دونوں اطراف ایک دوسرے کی سیکورٹی اور خودمختاری کا احترام کریں اور غیر ریاستی مسلح عناصر کے خلاف عملی اقدامات کریں۔ ہم اس بات کا یقین دلاتے ہیں کہ وطن کے دفاع میں کسی قسم کی کمی برداشت نہیں کی جائے گی اور ہر جارحیت کا مؤثر جواب دیا جائے گا۔
یہ بھی پڑھیں: افغانی آستین کا سانپ ثابت ہوئے جو بھارت کے کہنے پہ پاکستان اور مسلح افواج کیلئے خلاف استعمال ہو رہے،کشمیری عوام
قوم سے درخواست ہے کہ وہ متحد رہے، افواہوں اور نفرت انگیز پروپیگنڈے سے دور رہے اور پاک افواج کے ساتھ مکمل یکجہتی برقرار رکھے۔ کنٹرول رومز میں موجود جوانوں، زمینی اور فضائی فورس کے بہادر جوانوں کو قوم کا سلام اور دعاؤں کی بھاری دعائیں بھیجی جاتی ہیں۔
