(کشمیر ڈیجیٹل)ایشیا کپ کے پاک بھارت میچ میں بھارتی ٹیم کی جانب سے کھیل کے آداب کی خلاف ورزی پر صدر ایشین کرکٹ کونسل اور چیئرمین پاکستان کرکٹ بورڈ محسن نقوی نے شدید ردِعمل دیا ہے۔
محسن نقوی نے اپنے سوشل میڈیا پیغام میں کہا کہ کھیل میں سیاست کو گھسیٹنا اس کی اصل روح کے منافی ہے، اور یہ رویہ کھیل کی خوبصورتی کو متاثر کرتا ہے۔ ان کا کہنا تھا کہ امید ہے آئندہ فتوحات کو تمام ٹیمیں خوش اسلوبی اور وقار کے ساتھ منائیں گی۔
یاد رہے کہ دبئی اسٹیڈیم میں کھیلے گئے پاک بھارت میچ کے بعد بھارتی ٹیم نے پاکستانی کھلاڑیوں سے روایتی ہینڈ شیک سے انکار کیا تھا، جسے اسپورٹس مین اسپرٹ کے خلاف قرار دیا جا رہا ہے۔
پی سی بی کے مطابق پاکستانی ٹیم کے منیجر نوید اکرم چیمہ نے میچ ریفری کے رویے پر باضابطہ احتجاج درج کرایا ہے۔ ان کا مؤقف ہے کہ بھارتی کھلاڑیوں کا ہاتھ نہ ملانا کھیل کے بنیادی آداب کے خلاف ہے۔
یہ بھی پڑھیں: 200 روپے کے پرائز بانڈ کی قرعہ اندازی آج ملتان میں ہوگی
مزید برآں، قومی ٹیم کے کپتان سلمان علی آغا نے بھی بھارتی رویے پر احتجاجاً اختتامی تقریب میں شرکت نہیں کی۔ ذرائع کے مطابق ان کی عدم شرکت کی ایک وجہ یہ بھی بتائی گئی کہ تقریب کے پریزنٹر کا تعلق بھارت سے تھا۔
