اسلام آباد : پاکستان ٹیلی کمیونیکیشن اتھارٹی (پی ٹی اے) نے موبائل فون صارفین سے بغیر منظوری اضافی ٹیرف وصول کرنے کے بارے میں سوشل میڈیا پر پھیلائی جانے والی خبروں کی سختی سے تردید کی ہے ۔
پاکستان ٹیلی مواصلات اتھارٹی (پی ٹی اے) نے واضح کیا ہے کہ سوشل میڈیا پر یہ خبریں گمراہ کن ہیں اور حقیقت سے مطابقت نہیں رکھتیں ۔ پی ٹی اے کی جانب سے جاری وضاحتی بیان میں کہا گیا ہے کہ آڈیٹر جنرل آف پاکستان کی رپورٹ میں جاز کمپنی کے صارفین سے اضافی ٹیرف وصول کرنے کا ذکر نہیں ہے ۔
ترجمان اتھارٹی کے مطابق آڈٹ مشاہدات میں جن ٹیرف ایڈجسٹمنٹس کا حوالہ دیا گیا ہے وہ مکمل طور پر پی ٹی اے کے مقررہ ریگولیٹری فریم ورک کے مطابق منظور شدہ ہیں ۔ اس ضمن میں تمام منظوریوں کے مستند ریکارڈز آڈٹ حکام کے ساتھ تصدیق کے لیے شیئر کیے جا چکے ہیں ۔
یہ بھی پڑھیں:فیک کوریئرسروسز پیغامات سے متعلق ہوشیار رہیں، پی ٹی اے کا انتباہ جاری
بیان میں مزید کہا گیا ہے کہ پی ٹی اے صارفین کے مفادات کے تحفظ اور شفاف، منصفانہ ٹیلی کام نظام کی فراہمی کے لیے پرعزم ہے ۔ اتھارٹی مسلسل موبائل آپریٹرز کے ٹیرف پر نظر رکھے ہوئے ہے تاکہ ریگولیٹری تقاضوں کی پاسداری یقینی بنائی جا سکے اور کسی بھی غیر منصفانہ کمرشل پریکٹس کو روکا جا سکے ۔
