پشاور: وزیراعظم شہبازشریف اور فیلڈمارشل عاصم منیر نے سیلاب زدہ علاقوں کا دورہ کیا ہے۔
نجی ٹی وی کے مطابق وزیراعظم شہبازشریف اور فیلڈمارشل عاصم منیر سوات پہنچنے جہاں وفاقی وزیر امیرمقام نے دونوں کا استقبال کیا جبکہ وفاقی وزراء عطا تارڑ، امیر مقام اور احسن اقبال بھی وزیراعظم کے ساتھ تھے۔
وزیراعظم اور فیلڈ مارشل نے سوات کے بعد بونیر،شانگلہ اور صوابی کا دورہ کیا جہاں انہیں کے پی میں جاری ریسکیو اور ریلیف آپریشنز پر بریفنگ دی گئی۔
وزیراعظم ہاؤس کے اعلامیے کے مطابق وزیراعظم شہبازشریف نے متاثرین سے اظہار یکجہتی کیا اور ہر ممکن امداد فراہم کرنے کی یقین دہانی کرائی جبکہ وزیر اعظم اور شرکاء نے جاں بحق افراد کیلئے فاتحہ خوانی بھی کی۔
اس موقع پر وزیراعظم نے کہا کہ وفاقی حکومت اور پاک فوج متاثرین کی بحالی کیلئےتمام وسائل بروئے کار لائیں گے۔
وزیراعظم نےقبضہ مافیا، لکڑی مافیا اور کان کنی کی سرگرمیوں میں خلاف ورزیوں پر توجہ دلائی اور ہدایت کی کہ خلاف ورزی کرنے والوں کے خلاف فوری اور بلا امتیاز کارروائی کی جائے۔
یہ بھی پڑھیں: وزیراعظم یوتھ لون اسکیم 2025 کا آغاز، اسٹارٹ اپس کو لاکھوں روپے قرضہ دینے کا اعلان
شہباز شریف نے کہا کہ غیرقانونی قبضے، ٹمبر مافیا اور مائننگ سرگرمیاں بڑے نقصان کی وجہ ہیں، پاکستان کو سخت ریاست بننا ہوگا، ایسی سخت ریاست جہاں قانون سب پر یکساں لاگو ہو اور کسی کو استثنیٰ نہ دیا جائے، کسی کو قانون سے بالاتر نہیں ہونے دیں گے۔
فیلڈ مارشل عاصم منیر نے بھی سیلاب سے متاثرہ علاقوں میں تعینات افواج، پولیس اور سول انتظامیہ سے ملاقات کی اور اہلکاروں کی بے لوث خدمات کو سراہا۔
انہوں نے کہا کہ سیلاب متاثرین کی مدد اولین ترجیح ہے، کوئی کسر نہ چھوڑی جائے، ریسکیو اور ریلیف آپریشنز کو انتہائی جذبے اور محنت کے ساتھ جاری رکھا جائے ، متاثرہ خاندانوں کی مشکلات کم کی جائیں۔
یہ بھی پڑھیں: وزیراعظم اوروفاقی کابینہ کا ایک ماہ کی تنخواہ سیلاب متاثرین کیلئے عطیہ کرنیکا اعلان
فیلڈ مارشل نے کہا کہ فورسز اور سول ادارے اپنی انتھک خدمات جاری رکھیں، شہریوں کی جانوں کا تحفظ اور ان کی امداد اولین ترجیح ہونی چاہیے۔
خیال رہے کہ خیبر پختونخوا میں حالیہ بارشوں اور سیلاب سے اب تک 350 سے زائد افراد جاں بحق ہوئے ہیں جن میں 228 کا تعلق بونیر سے ہے۔
