پاکستان وائٹ بال کرکٹ ٹیم کے ہیڈکوچ مائیک ہیسن نےکہا ہےکہ ہم نے حالیہ ٹی ٹوئنٹی سیریز اور ایشیا کپ کے لیے انتہائی شاندار اسکواڈ تشکیل دیا ہے۔
مائیک ہیسن نے سوشل میڈیا پر پاکستان کے ایشیا کپ اور ٹی ٹونٹی اسکواڈ پر تبصرہ کرتے ہوئے کہا کہ یہ دیکھ کر اچھا لگا کہ کچھ نئے کھلاڑی سینئر اور تجربہ کار کھلاڑیوں کے ساتھ اپنی جگہ بنا رہے ہیں، سہ ملکی سیریز اور ایشیا کپ کے لیے تجربہ کار اور نئے کھلاڑیوں کا یہ اچھا امتزاج ہے۔
مائیک ہیسن کا کہنا تھا کہ ہمارے اسکواڈ میں یو اے ای کنڈیشنز کے حساب سے 5 پیسرز اور دو مسٹری اسپنرز شامل ہیں، مجموعی طور پر اچھی بیٹنگ، نمایاں بہتری والی فیلڈنگ اور بولنگ اٹیک کے ساتھ یہ ایک بہترین اور متوازن اسکواڈ ہے۔
عاقب جاوید کا کہنا تھا کہ ٹی ٹوئنٹی اگر سیدھے بلے سے کھیلنا ہے تو پھر ٹی ٹوئنٹی کھیلنی نہیں چاہیے، صائم، صاحبزادہ اور فخر زمان اچھا کھیل رہے ہیں ان پر کسی کو شک نہیں ہونا چاہیے۔
یہ بھی پڑھیں: تین ملکی ٹی ٹوئنٹی سیریز اور ایشیا کپ کے لیے پاکستان کا اسکواڈ اعلان کر دیا گیا،بابراعظم، محمد رضوان کی چھٹی!
عاقب جاوید کا کہنا تھا کہ کسی کھلاڑی کی فارم کو تین میچز کی فارم پر جانچنا ایک سخت فیصلہ ہے، بابر نے پہلا میچ اچھا کھیلا، انہیں کچھ ایریاز میں بہتر کرنےکا کہا گیا ہے، صاحبزادہ فرحان 6 میچز میں سے تین میں مین آف دی میچ رہے ہیں۔
عاقب جاوید کے مطابق بابر اعظم اور محمد رضوان اس سے پہلے تین سیریز میں نہیں تھے، بابر اور رضوان دیگر کی طرح کھیلیں گے تو ضرور ٹی ٹوئنٹی کھیلیں گے، ان کے ساتھ کسی کو پرابلم نہیں ہے لیکن اس وقت ہمارے پاس آپشنز اچھے ہیں۔
صائم ، فخر اور صاحبزادہ فرحان ہی ٹاپ آرڈر میں تھے۔ کسی کھلاڑی کو دو تین میچز کی بنیاد پر زیر غور نہ لانے والی بات درست نہیں، ہم یہ نہیں کہہ سکتے کہ اب ہم بابر اور رضوان کو زیر غور کبھی نہیں لائیں گے۔
