(کشمیر ڈیجیٹل)اسٹیٹ بینک آف پاکستان نے وفاقی حکومت کی ہدایت پر ’’جشنِ معرکۂ حق‘‘ اور یومِ آزادی کے موقع پر 75 روپے مالیت کا یادگاری سکّہ جاری کر دیا۔ یہ سکّہ مسلح افواج کی بہادری کو خراجِ تحسین پیش کرنے کے لیے خصوصی طور پر تیار کیا گیا ہے۔
اسٹیٹ بینک کے مطابق یہ سکّہ نکل اور پیتل سے تیار کیا گیا ہے، جس میں 79 فیصد تانبہ، 20 فیصد زنک اور ایک فیصد نکل شامل ہے۔ اس کا قطر 30 ملی میٹر اور وزن 13.5 گرام ہے۔
سامنے کا رخ: سکّے کے وسط میں بڑھتا ہوا ہلال اور پانچ نوکوں والا ابھرتا ستارہ شمال مغرب کی سمت میں نمایاں ہے۔ ستارے اور ہلال کے اوپر کنارے کے ساتھ اردو میں ’’اسلامی جمہوریہ پاکستان‘‘ کندہ ہے، جبکہ چاند کے نیچے اور گندم کی خمیدہ بالیوں کے اوپر عددی صورت میں ’’2025‘‘ درج ہے۔ ستارے اور ہلال کے دونوں جانب بالترتیب جلی اعداد میں ’’75‘‘ اور اردو رسم الخط میں ’’روپیہ‘‘ تحریر ہے۔
پچھلا رخ: پچھلے حصے میں وسط میں ’’معرکۂ حق‘‘ اور ’’2025‘‘ درج ہیں۔ بالائی کنارے پر ’’پاکستان ہمیشہ زندہ باد‘‘ تحریر ہے، جبکہ دونوں جانب دو لڑاکا طیارے، بحری جہاز اور ملٹی پل راکٹ لانچر سسٹم ابھرتے ہوئے دکھائی دیتے ہیں۔
یہ بھی پڑھیں: عجمان میں الیکٹرک اسکوٹر چلانے پر پابندی عائد
یہ یادگاری سکّہ اسٹیٹ بینک بینکنگ سروسز کارپوریشن کے فیلڈ دفاتر کے ایکسچینج کاؤنٹرز پر 15 اگست 2025ء سے عوام کے لیے دستیاب ہے۔
