راولاکوٹ (کشمیر ڈیجیٹل)صدر ریاست آزاد جموں وکشمیر و چانسلر آزاد جموں وکشمیر جامعات بیرسٹر سلطان محمود چوہدری نے عوامی نمائندوں اور معززین علاقہ کی موجودگی میں جامعہ پونچھ راولاکوٹ کے (چھوٹا گلہ کیمپس) کا سنگ بنیاد رکھ دیا۔صدر ریاست بیرسٹر سلطان محمود چوہدری کا کہنا تھا کہ اس منصوبے کا افتتاح میرے لئے ایک خواب کے ساتھ چیلنج بھی تھا۔
وائس چانسلر جامعہ پونچھ پروفیسر ڈاکٹر ذکریا ذاکر اور اُن کی ٹیم کو مبارکباد دیتا ہوں کہ انہوں نے اس منصوبے کو دوبارہ شروع کرنے کے لئے طویل جدوجہد کی
مجھے امید ہے کہ 3.5ارب روپے کی بھاری لاگت سے تعمیر ہونے والا یہ پروجیکٹ نہ صرف جامعہ پونچھ کی تدریسی اور تحقیقی سرگرمیوں میں اہم تبدیلیوں کا باعث بنے گا
انشاء اللہ یہ پروجیکٹ اگلے سال اگست 2026میں پایہ تکمیل کو پہنچے گا۔ یہ منصوبہ اس علاقے کی معاشی سرگرمیوں میں بھی ترقی لانے کے لئے اہم ثابت ہو گا۔ ہمارے لیے سب سے قابل فخر بات یہ ہے کہ ہم قوم کے مستقبل اور آج کی نوجوان نسل پر بھاری سرمایہ کاری کر رہے ہیں
نوجوان ہی ہمارا مستقبل ہیں اور نوجوانوں پر سرمایہ کاری دراصل اس قوم کے روشن مستقبل کے لئے سرمایہ کاری ہے۔ اس مقصد کے لئے حکومت نے اعلیٰ تعلیم کے شعبہ میں بھاری سرمایہ کاری کی ہے۔
اس وقت آزاد کشمیر میں اعلیٰ تعلیم کے فروغ کے لئے 6پبلک سیکٹر یونیورسٹیز موجود ہیں جن میں ہزاروں کی تعداد میں طلبہ و طالبات انتہائی پرامن اور سازگار ماحول میں معیاری تعلیم حاصل کر رہے ہیں۔
مجھے اس بات کی بھی بے حد خوشی ہے کہ جامعہ پونچھ میں اس وقت عالمی معیار کی فیکلٹی موجود ہے جو نہ صرف طلبہ کی تعلیم اور تحقیق پر توجہ دے رہی ہے بلکہ طلبہ کی کردار سازی اور کیرئیر کونسلنگ پر بھی خصوصی توجہ دی جا رہی ہے۔
تقریب میں سابق صدر آزادکشمیر سردار محمد یعقوب خان، ممبر آزادجموں وکشمیر قانون ساز اسمبلی سردار حسن ابراہیم خان، سابق وزیر حکومت سردار عابد حسین عابد،وائس چانسلر جامعہ پونچھ پروفیسر ڈاکٹر ذکریا ذاکر،صدارتی مشیر سردار امتیاز خان اور دیگر بھی موجود تھے۔
اس موقع پر وائس چانسلر جامعہ پونچھ پروفیسر ڈاکٹر ذکریا ذاکر نے چھوٹا گلہ کیمپس کے پروجیکٹ پر صدر ریاست آزادجموں وکشمیر و چانسلر آزاد جموں وکشمیر جامعات بیرسٹر سلطان محمود چوہدری کو بریفنگ بھی دی۔
اس موقع پر صدر ریاست آزاد جموں و کشمیرو چانسلر آزاد جموں وکشمیر جامعات بیرسٹر سلطان محمود چوہدری نے اپنے خطاب میں مزید کہا کہ میں کویت فنڈ فار عرب اکنامک ڈویلپمنٹ کا خصوصی طور پر شکریہ ادا کرتا ہوں جن کے تعاون سے ہم اس منصوبے کو تکمیل تک پہنچانے کے لئے پر عزم ہیں۔ میں چھوٹا گلہ کمیونٹی کا بھی شکریہ ادا کرتا ہوں کہ جنہوں نے اس منصوبے کو عملی جامہ پہنانے کے لئے اپنی زمینیں دیں۔
صدر ریاست آزاد جموں و کشمیرو چانسلر آزاد جموں وکشمیر جامعات بیرسٹر سلطان محمود چوہدری نے کہا کہ اب انشاء اللہ وہ وقت قریب ہے کہ آپ اپنی دہلیز پر ایک عالمی معیار کی جدید یونیورسٹی دیکھیں گے اور میں جامعہ پونچھ راولاکوٹ کے روشن مستقبل اور ترقی کے لئے پرامید ہوں۔
اس سے قبل صدر ریاست آزاد جموں وکشمیر و چانسلر آزاد جموں وکشمیر جامعات بیرسٹر سلطان محمود چوہدری نے چھوٹا گلہ کیمپس کے سنگ بنیاد رکھنے کے موقع پرتختی کی نقاب کشائی بھی کی۔
آزاد کشمیر اسمبلی اجلاس، خالی عمارت معاملے پر گرما گرم بحث،اپوزیشن کا واک آوٹ
