مظفرآباد میں وقفے وقفے سے بارش کا سلسلہ شروع ہونے کے بعد موسم انتہائی خوشگوار ہو گیا ہے جس سے شہری خوشگوار موسم سے بھرپور لطف اندوز ہوتے دکھائی دے رہے ہیں۔ موسم کی اس تبدیلی کے ساتھ ہی شہری گرم ملبوسات زیبِ تن کیے سڑکوں اور بازاروں میں نظر آ رہے ہیں۔
بارش کے بعد پہاڑوں پر چھائے بادلوں اور دھند نے وادی کے قدرتی حسن کو مزید دلکش اور دلفریب بنا دیا ہے۔ پہاڑوں پر بادلوں کے خوبصورت مناظر شہریوں اور وہاں موجود سیاحوں کی توجہ کا خاص مرکز بنے ہوئے ہیں۔
محکمہ موسمیات کی پیشگوئی اور بارہ گھنٹوں کی صورتحال:
محکمہ موسمیات کی جانب سے آزاد کشمیر، پنجاب اور خیبر پختونخوا کے مختلف علاقوں میں ہواؤں اور گرج چمک کے ساتھ بارش کی پیش گوئی کی گئی ہے۔
محکمہ موسمیات کی جاری کردہ پیشگوئی کے مطابق آئندہ بارہ گھنٹوں کے دوران ملک کے بالائی علاقوں میں مطلع جزوی طور پر ابر آلود رہے گا۔ جبکہ اس کے ساتھ ساتھ آزاد کشمیر، گلگت بلتستان، خیبر پختونخوا، اسلام آباد اور بالائی و وسطی پنجاب میں تیز ہواؤں اور گرج چمک کے ساتھ مزید بارش کا امکان ظاہر کیا گیا ہے۔ دوسری جانب ملک کے دیگر تمام علاقوں میں موسم عام طور پر خشک رہے گا۔
یہ بھی پڑھیں: محکمہ موسمیات کی بارش کی پیشگوئی، کہاں کہاں بادل برسیں گے؟
بڑے شہروں میں ریکارڈ کیا گیا صبح کا درجہ حرارت:
محکمہ موسمیات کی جانب سے آج صبح ملک کے بعض اہم اور بڑے شہروں کا درجہ حرارت بھی جاری کیا گیا ہے جس کی تفصیلات درجہ ذیل ہیں:
اسلام آباد میں درجہ حرارت 20 ڈگری سینٹی گریڈ، لاہور میں 22، کراچی میں 28، پشاور میں 21، جبکہ کوئٹہ اور مظفرآباد میں 17 ڈگری سینٹی گریڈ ریکارڈ کیا گیا ہے۔ اس کے علاوہ گلگت میں 14 اور مری میں درجہ حرارت 11 ڈگری سینٹی گریڈ رہا ہے۔
مقبوضہ جموں و کشمیر کے لیے موسم کی صورتحال:
بھارت کے غیر قانونی زیر قبضہ جموں و کشمیر کے لیے بھی موسم کی پیشگوئی جاری کی گئی ہے جس کے مطابق سرینگر، جموں، لیہہ، پلوامہ، اننت ناگ، شوپیاں اور بارہ مولہ میں مطلع جزوی طور پر ابر آلود رہنے اور کہیں کہیں گرج چمک کے ساتھ بارش کا امکان ہے۔
مقبوضہ علاقے میں آج صبح ریکارڈ کیے گئے درجہ حرارت کے مطابق سرینگر میں 13 ڈگری سینٹی گریڈ، جموں میں 22، لیہہ میں 1، پلوامہ، اننت ناگ اور بارہمولہ میں 12 جبکہ شوپیاں میں درجہ حرارت 11 ڈگری سینٹی گریڈ ریکارڈ کیا گیا ہے۔
