پاکستان کرکٹ ٹیم کے باؤلنگ کوچ ایشلے نوفکی نے ذاتی وجوہات کا عذر پیش کرتے ہوئے اپنے عہدے سے استعفیٰ دے دیا ہے، جس کے نتیجے میں پاکستان کرکٹ بورڈ یعنی پی سی بی نے فوری طور پر نئے باؤلنگ کوچ کی تلاش کا عمل شروع کر دیا ہے۔
ایشلے نوفکی کا نیا معاہدہ اور ذمہ داریاں:
موصولہ اطلاعات کے مطابق ایشلے نوفکی کے لیے آئندہ ایشین گیمز 2026 پاکستان ٹیم کے ساتھ آخری سیریز ثابت ہوں گی، جس کی تکمیل کے بعد وہ قومی ٹیم کے ساتھ اپنی تمام تر کوچنگ ذمہ داریوں سے باضابطہ طور پر سبکدوش ہو جائیں گے۔ انہوں نے گزشتہ سال مئی میں یہ عہدہ سنبھالا تھا، جبکہ دورہ انگلینڈ کے دوران عمر گل کو ہٹانے کے بعد انہیں ریڈ بال ٹیم کی کوچنگ کی اضافی ذمہ داری بھی سونپی گئی تھی۔
ذرائع کا مزید کہنا ہے کہ ایشلے نوفکی اب نیدرلینڈز کرکٹ ٹیم کے نئے ہیڈ کوچ کے طور پر فرائض انجام دیں گے، جہاں وہ وائٹ بال کرکٹ میں ڈچ ٹیم کی کوچنگ کریں گے۔ نیدرلینڈز کرکٹ بورڈ کے ساتھ ان کا دو سالہ معاہدہ طے پایا ہے، اور وہ آنے والے 2027 مینز ورلڈ کپ اور 2028 ٹی ٹوئنٹی ورلڈ کپ کی کوالیفکیشن مہم میں نیدرلینڈز ٹیم کے ساتھ ہوں گے۔
یہ بھی پڑھیں: محمد رضوان کو پریزیڈنٹ ٹرافی نہ کھیلنے دینے کی وجہ سامنے آگئی
پی سی بی کی طرف سے نئے باؤلنگ کوچ کی تلاش:
ایشلے نوفکی کے مستعفی ہونے کے بعد پاکستان کرکٹ بورڈ نے قومی ٹیم کے نئے باؤلنگ کوچ کی تقرری کے لیے باقاعدہ طور پر اشتہار جاری کر دیا ہے۔
پی سی بی کے طے کردہ ضوابط کے مطابق اس اہم ترین عہدے کے لیے امیدوار کے پاس کم از کم پانچ سال کا کوچنگ تجربہ اور لیول تھری کوچنگ کی بنیادی اہلیت ہونا لازمی قرار دیا گیا ہے۔ اس عہدے کے حصول کے خواہشمند امیدوار آٹھ اکتوبر تک اپنی درخواستیں بورڈ کو ارسال کر سکتے ہیں۔
